Per la quale cosa, devo scusare moglierema, se l’è schiaffato
ncapo st’omore malanconeco de sentire cunte. Però, se ve piace de dare mbrocca a lo sfiolo de la prencepessa mia e de cogliere miezo a le voglie meje, sarrite contente pe sti quattro o cinque juorne, che starà a scarrecare la panza, de contare ogne jornata no cunto peduno de chille appunto, che soleno dire le vecchie pe trattenemiento de peccerille, trovannove sempre a sto luoco stisso. Dove, dapò avere ngorfuto1, se darrà prenzipio a chiacchiarare, termenannose la jornata co quarche egroca, che se recetarrà da li medeseme sfrattapanelle2 nuestre, pe passare allegramente la vita, e tristo chi more!» A ste parole azzettaro tutte co la capo lo commannamiento de Tadeo; fra tanto, poste le tavole, e venuto lo mazzecatorio, se mesero a magnare; e, fornuto de gliottere3, fece lo prencepe signale a Zeza scioffata, che desse fuoco a lo piezzo; la quale, fatto na granne ncrinata a lo prencepe e a la mogliere, cossi commenzaje a parlare.
- ↑ Trangugiato, mangiato.
- ↑ Servitori di casa.
- ↑ Ingoiare
