 |
Questa pagina è stata trascritta, formattata e riletta. | |
| 12 | lo cunto de li cunti |
matina appe n’autra lettera all’autra sore, co na castagna, dannole lo stisso avertemiento, che le fu dato co la noce. E, dapò avere caminato, jonze a lo castiello de la fata, che, fattole mille carizze, a lo partirese, la matina, le consignaje na nocella co la stessa protesta; che no l’apresse maje, se la necessità no la scannava. Aùte sto cose Zoza, se mese le gamme ncuollo, e tanta votaje paise, tanta passaje vuosche e shiommare, che, dapò sett’anne, appunto quanno lo sole ha puosto sella pe correre le solite poste, scetato da le cornette de li galli, arrivaje quase scodata a Campo retunno. Dove, primma che trasire a la cetate, vedde na sebetura de marmoro, a pede na fontana, che, pe vederese dinto no cremmenale1 de porfeto, chiagneva lagreme de cristallo. Da dove levato la lancella, che nc’era appesa, e postasella miezo a le gamme, commenzaje a fare li duje simele2 co la fontana, e non auzanno mai la capo da lo voccaglio3 de la lancella; tanto che, manco termene de duje juorne, era arrivata doi deta sopra lo cuollo, che non ce mancavano due autre deta ed era varra4. Ma, pe tanto trivoliare, essenno stracqua, fu, non volenno, gabbata da lo suonno; de manera che fu costretta d’alloggiare no paro d’ore sotto la tenna de le parpetole. Fra lo quale tiempo, na certa schiava gamme de grillo, venenno spisso a nchire no varrile a chella fontana, e sapenno la cosa de lo spetaffio, che se ne parlava pe tutto, comme vedde chiagnere tanto Zoza, che faceva dui piscericole de chianto, stette facenno sempre le guattarelle5, aspettanno che la lancella stesse a buon termene, pe guadagnarele de mano sto bello riesto, e farela restare co na vranca de mosche mmano6. E, comme la vedde addormuta, servennose de
