«Starraggio sempre sulo»,
— Io le decette — , «e puosto a no pentone,
Justo comm’a cuculo,
Chiagnenno de menestra no voccone,
Ca na mogliere te n’abbotta ogn’ora!»
Diss’isso: «Frate, adonca, e tu te nzora!»
«Me farrà tanta figlie»,
— Io disse — , «che jarranno pe la casa,
Justo comme a coniglie;
Starraggio sempre maje drinto la vrasa,
Penzanno comme l’aggio da campare!»
Ed isso leprecaje: «No te nzorare!»
«Ma, se cado ammalato,
Chi me fa na panata o no cristiero!»,
— Diss’io — , «e abbannonato
So dall’ammice, comme a no sommiero.
N’è meglio tanno, arrassosia, ch’io mora?» —
«S’è chesso, — me respose — , «e tu te nzora!»
«N’aggio granne appetito»,
— Diss’io — , «ma, s’ave male cellevriello,
E me manna a Cornito
Chella che piglio, patre de l’agniello,
E po torno a Forcella ad abetare...»
«Scumpe!», — diss’isso — , «e tu no te nzorare!»
«Voglio propio sapere»,
— Diss’io — , «da te co hai lietto lo Donato,
Dove m’aggio a tenere:
Aggiome da nzorare, o star squitato?
Ca, comme me resuorve, a la stess’ora,
Me proveo de mogliere o de signora».
