 |
Questa pagina è stata trascritta e formattata, ma deve essere riletta. | |
| 24 | S. MATTEE |
22 Ghe ne sarà tanti, che allora me disaran: Signor, Signor, ma nun emm minga profettizzaa a tò nomm, e emm minga casciaa via el diavol a tò nomm, e emm minga faa tanti miracoj a tò nomm?
23 E allora mì ghe cantaroo ciar: Mi v’hoo mai conossuu: stee a la larga de mi tucc vialter, che avii faa di balossad.
24 Donca tucc quij, che sent sti mè paroll, e je mett in pratega, el sarà parangonaa a l’omm prudent, che l’ha tiraa su la soa cà sul sass,
25 E l’è piovuu, e s’è sgonfiaa i fiumm, e han boffaa i vent, e han faa el diavol adree a quella cà, e l’è minga borlada giò: perchè la gh’aveva i fondament sul sass.
26 Chi se sia, che scolta sti mè paroll, e je mett minga in pratega, el sarà istess de l’omm stupid, che l’ha tiraa su la cà su la sabbia.
27 È piovuu, e s’è ingrossaa i fiumm, e han ziffolaa i vent, e han faa el diavol adree a quella cà, e l’è borlada giò cont on gran spettasceri.
28 È success, che quand Gesù l’ha avuu fenii de parlà, quella frotta de gent l’era incantada de la soa dottrina.
29 Perchè lu je instruiva, perchè el podeva fall, minga compagn di sò Scriba e Farisee.
