Pagina:Çittara zeneize 1745.djvu/138

XIV.

Q
uesti córpi de foscina sì netti,

Chi mandan, solamenti de fâ l’atto,
Ri pesci à parlâ subito a Pilatto,
Per quanto armǽ de mille corsaletti,

Se in paragon, Maxiña, ti ri metti
Con quelli dri tœu œuggi, oh che descatto!
Questi son comme a dî córpi de ciatto,
Quelli son córpi a pointe de stiletti.

Se questi son dri pesci ro terrô,
Quelli son ro terrô dri Crestien:
Fan cazze lì da parte dro Segnô.

Pensa aora, tíe ra vitta da chen,
Che a Ballin in sò vitta ha dæto Amô,
Chi d’atro che de lô non ro manten!