Nel mes di mai, alor' che dai monz gris
 |
Questo testo è completo. | |
Nel mes di mai, alor’ che dai monz gris
a disfasi l’umor si va vedínt,
e che di za il teren di sot ai pis
Zèfiro tepidét nus va amolínt,
alora apònt son arivàz chei dis,
nei quai lu bo si à da vedé zemínt
de uàrzina pesant sot al rigor,
e lustràt sot al solc il dur versor.
Chel semenàt sarà simpri plui ric,
che doplamenti l’avarà patít
tant del fret che del cialt l’alterno intríc,
e ‘l rindarà content anc’ l’apetit
del vilan, ch’ emplerà l’ingòrt bultríc,
se prima da la fan za ‘l era arsít;
la prova à fat vedè che del granàr
un tal racolt sol sfonderà il solar.
Prima però d’arà l’incognit plan
bisugn’ avé dei vinz l'esperïenza,
e convèn imparà di man in man
de l’aria iu azzidènz e l’inflüenza;
bisugn’ avé, par no strussiasi invan,
de qualitàt dei siz duta la scienza,
e vedé ze che abrazza e che aborís
la natura, e l’istínt d’ogni pais.
Parzé che in qualchi luc felizzementi
rïés a maravea il semenàt,
e in qualch’altra contrada solamenti
il brut de l’üa ‘lè privilegiàt;
son po dei altris siz, che parimenti
possedin una tal felizzitàt,
che vadin par natura ognor supiarbis
d’arbui, di viz, di semenàz e iarbis.
Viostu zimút che i siei soäfs odórs
Tmolo nus manda, e l’India nus da ‘l cens
del fin avoli, e dei estrèms calórs
nus da ‘l Sabëo il religiós incens?
Il Càlibe di fiar nus dà socòrs
e l' odór del castori acút e intens
Ponto nus manda, e d’Albania lis stalis
puartin la palma d’ezzelènt’s ciavalis.
Chesta è in suma la lez, chesc’ son iu paz
che inatamenti la natura à dat
a ziarz lucs e iu à cussì leàz
ch’ il prezèt in natura è ‘za passat,
e in timp apònt, quant che forin butàz
iu clas nel antic mont disabitàt
dal bon Deucalïon, dai quai si spazza
che nassès po del om la dura razza.
Su, doncia, in primavera a dà di man
scomenza al to versór, e ‘l gras teren
ara traviars cun Ròs e Paduan,
a ciò lis zolis messedadis ben
si svein de so pigrizia e dein del pan,
come sol dà la mari il lat dal sen;
e sul vigor po de stasòn madura
lis cuei d’estat la polverosa arsura.
Ma se la tiara no sarà feconda
del pegri Arturo iust il prim ingres,
ròmpila sutilmenti e no trop fonda:
ch’altrimenti la iarba nosarès
al semenàt, e l’arena infeconda
umor bastant za mai rizzevarès;
anzi lassa che ‘l polsi alternamenti
il ciamp un an sí, un no, cuietamenti.