N Salüt a Pöz (grafia moderna)
 |
Questo testo è da formattare. | |
Questo testo fa parte della raccolta Stóries e chiánties ladines (grafia moderna)VII. N Salüt a Pöz.
I ves salüdi, mi bi crëps de Pöz dër alc!
I ves salüdi dötes, gran pizades,
Plü dërtes co bi ciampanis, spizes sciöche tlalc!
N salüt ʼci a dʼ os, fezöres dlunch sarades!
N salüt a te, mi gran bel plan dl bel Ciampëi!
Mile dilans, oh bel lech, por la ligrëza,
Renovada vignʼ ota, chʼ i podô tʼ odëi
Y fá de beles ores cun sveltëza!
A te, oh bela fontana, mile rengraziamënc!
Mile dilans de tüa gran scincunda dʼ ega,
Che ressorí i stanc fej döt ligri y döt contënc,
Miú de zücher che cun le dër golus delega.
pagina:31
Ares sʼ un é les ores, passades gonot
Dlungia te sön chël bel banch o sölʼ erba;
Cun le stlop vagân datrai por le bel rondení n bot,
Mai por copé ciamurc da na gran berba.
I te salüdi, bel Col da La Soné dit!
Dër ion de chësc inom la gauja aldissi.
Porcí asʼ tres y tres lʼ edl vers Crespëna fit?
Sce tʼ as valʼ posta, ion te socodissi.
ʼCi a te n salüt, n salüt dër bel, de mile coi le re!
I te salüdi, Col de Muntejela!
Otes bëgn plü de cënt sön to bel ce ái pesté,
Sön te vignʼ ota mʼ ái paré ia lʼ aurela.
A dër pücia fadia dasʼ tö n dër bel paiamënt;
To cör deuresʼ, col rich, ala gran sciënza;
Lʼ edl, dʼ odëi la natöra corius, döt contënt
Vëiga iló dl bun Dî la gran presënza.
N salüt a te, Rochëta, la val dles vals!
Vergina esʼ tö, de beles flus curida,
Vergina tra vedli grisc, döt vergina zënza falz,
Por düc chi chʼ iló röia ostira saurida.
N salüt a te sëgn, bela Piza dla munt!
A te chiló n inchin feji, regina;
Bel piz, gonot da ria saita toché y arjunt,
Dan te plëgn de maesté vignun sʼ inchina.
De te, regina, fej i sni ciamurc mantel;
Tö t’ es por ëi de döt refugio la oma;
ʼCër te ia vai dlunʼ saltan da burt tan co da bel,
Sigüsc se vëighi iló, mai nʼ él che toma.
Tö, oh bela Piza, adores de Dî la maesté,
La pröma tra les pizes indorada.
pagina:32
Tö la ultima de Dî potënt la santité
Salüdes cun inchin en gran parada.
Sön te piega cun devoziun le devot le jenëdl
Y adora dl bun Dî la presënza,
Canche döt cant slomina, indoré da sorëdl,
Cherié por nosc bëgn dala gran Providënza.
N salüt a te, bel lech döt bröm, plëgn de socrëc,
Tö, la plü bela flu en döta Crespëna!
Cun te rajona ion y dër gonot socrëc,
Tormentá da fistide y da gran pëna.
N salüt a te, de döt Pöz la gran bela munt!
Mile dilans y mile grazies a te diji;
Inmez a te ái de bugn pinsiers la colm arjunt,
En te de Dî la gran potënza lii.
Inmez a tües pizades y tü bi lastuns
Vigni ri y burʼ pinsier en me á dé bando;
Munt plü santa co mile santes amoniziuns,
En te nʼ á lerch cez chʼ é de contrabando!
N ultim salüt ciamó, oh de Pöz la bela munt!
Da te mëssi, sciöche möt che mëss da si oma;
Fezöra sarál prësc tra me y te zënza punt,
Sciöchʼ al nʼ é punt mai no tra Roma y Roma. 1895