Mi ciasòta
 |
Questo testo è da formattare. | |
Mi ciasota.
Mi ciasota.
’L fova na pitla ciasota, a la bona, de lën,
Ma la fova mia, y blota, y da sté gën;
La rondules, muntres bele da duman,
Julova ite y ora se la ciantan.
Tla chëurt ovi n droch cun si funtana,
Cun ega bona frëscia y sana;
Y dan cësa fòvel n tel pitl verzon
Cun ciblons y salata de cherscion.
Do cësa, te si pitla stala, mi zieba, la cëura,
La gialines y n gial che cherdova bel’ abenëura.
Te stua, sun balcon, la gabia cul ucel
Y mi bon Pimperle sun ban da furnel.
pagina:47
Chësc fova dut mi pitl avëi,
Che giut cuntënt ei pedù me giaudëi;
Ma lauran y sparanian sciche n bon fant
L’ ei meneda propi scialdi inant.
Po canche la fertuna m’ à fà rich
Y di granc l cumpagni y amich,
Mi pitla ciasota ne m’ à plu scusà,
Y per puech a fulestieres l’ ei data ca.
Śën ei na cësa propi da gran seniëur,
Njegniëda ite do l plu bel y l miëur,
Y cun duta la comoditeies leprò,
Y pedientri che me servësc dant y do.
Śën ëssi bën dut l bel y tan l muet,
Ma mi cuer se sënt mpo puere y uet;
Mi pitla cësa, ulach’ è passà alegra giuventù,
O, chël ne ie mi bel y gran palaz mei, no, no mei plu.
Truep grosc y truep avëi, ne l cherdëis,
Dà gran festidesc, ie suënz de pëis;
La pèsc dl cuer y la vera cuntentëza
Dà mé l fé dl bën, ma no la gran richëza.