Les bones eghes di Ladins
 |
Questo testo è da formattare. | |
Les bones eghes di Ladins
L' Signur Idî é con düć bun;
con so aiüt é düt sann y intun:
i vicí per aria, i romuns te tera,
i pësc dl mer y ćiaussa y polam,
düt salta y scrićia y fej na gran vera
a laldè l' bun Dî ch' i mantëgn per düt l' ann.
A nos, püra jëint, a nos, püri Ladins,
nes dál bëgn mius robes ch' a püri cozins.
I ne n' ô contè sö düt chël che godun
per grazia de Dî ch' é nosc gran patrun,
mo te' bones eghes, te' bones fontanes
ch' al ava bel' dè zacan ales ganes,
mëssen bëgn reconësce y déssen laldè;
a düt l' monn l' messéssen contè!
Podun avëi ći mal che orun
che üna o l' atra nes cuncia l' magun.
Y os, püri vedli, che jîs col bachët,
os dal mè sëch, passed' Côl Maladët,
sa Morin Rot da Calfosch a bëir' ega,
y che fosses jö in funz de Marô o a Longega!
Y sce sëis impedrí de valch vers, a Borjé
él na fontana! Mâ jide a ćiarćé!
Y spo a Pedraces, impêr a Badîa,
zënza bëir' ega degun passa ía;
ala tofa da solper y da üs frać,
mo sc' an en bëi, devënten alegri y mec mać.
O plaies o valch ater bur mal
söla pel varësc düt a Romostluns da La Val!
O jide magari t' Al Plan de Marô
che sarês servis sciöco fosses un prô.
Y l' miú de düć, l' Bagn de Valdander,
che fej te ćialdira na crosta de cënder.
Na te' ega da bagn ne n' él nia dalunc
per vigne mal che brüja o che punc.
Dunch, vedli y jogn y mitans y mituns,
ne messês ester mać y passè i confins -
sce jîs a bagn - de nos püri Ladins,
porćî [ch'] ai á dit nosc poder y nosc prô
che te' bone[s] eghes ne n' éle inió!