Lege provinziela dl 18 de mei 2006, nr. 3 - Ntervënc tla materia dla dependënzes
 |
Questo testo è incompleto. | |
Lege provinziela dl 18 de mei 2006, nr. 3 1)
---
Ntervënc tla materia dla dependënzes
1. (Ciamp d’aplicazion)
(1) Chësta lege regulea i ntervënc n cont dl consum de sustanzes psicoatives nia legheles, de alcol, tabach y medejines psicotropes sciche nce di juesc de fortuna, tres n sistem de servijes.
2. (Sistem de servijes)
- (1) Pra l sistem de servijes toca:
- a) i servijes saniteres spezialisei per la dependënzes (Ser. D.);
- b) i dutores de medejina generala, i raions saniteres, la sëntes de spedel, la strutures de degënza y i servijes teritoriei dl servisc saniter provinziel;
- c) la strutures terapeutiches staziuneres y n pert staziuneres;
- d) i servijes dl raion soziel
- e) i servijes soziei staziuneres y n pert staziuneres spezialisei;
- f) chësta repartizions provinzieles:
- 1) Ënc locai
- 2) Cultura tudëscia y familia
- 3) Cultura taliana
- 4) Ntendënza per la scoles tudësces
- 5) Ntendënza per la scoles talianes
- 6) Furmazion prufescionela taliana
- 7) Furmazion prufescionela tudëscia y ladina
- 8) Furmazion prufescionela per l’agricultura, i bòsc y l’economia de cësa
- 9) Cultura y Scola ladina
- 10)Lëur
- 11)Sanità
- 12)Politiches sozieles
- 13)Artejanat, ndustria y cumerz
- 14)Turism
- 15)Mubiltà
- g) La urganisazions privates acreditedes.
(2) L sistem di servijes à, tl ciamp dla cumpetënzes singules, l duvier de schivé y de cuntrasté l fenomenn dla formes defrëntes de dependënza, de sustenì l tratamënt y la reabilitazion, de purté pro a na cultura dla sanità y a cumpurtamënc respunsabli sciche nce chël de limité l’emarginazion soziela.
(3) I raporc danter i servijes defrënc ie regulei dai protocoi de cunsëns.
(4) La repartizions dl spedel y la strutures de degënza dl servisc saniter provinziel garantësc la lueges liet che ie debujën per i tratamënc de dejusamënt dai opiac, dal alcol y da d’autra sustanzes psicoatives.
3. (Ntervënc)
- (1) I ntervënc n cont dl cunsum de sustanzes psicoatives nia legheles, de alcol, tabach y de
medejines psicotropes y n cont di juesc de fertuna ie:
- a) la prevenzion universela y seletiva,
- b) l tratamënt y la reabilitazion sanitera coche ënghe la reabilitazion soziela,
- c) l smendrimënt de pericui y danns. (2) Cun la delibrazion dla Jonta provinziela che ie da publiché tl Buletin Ufiziel dla Region, vëniel
stabilì i criteres y la modaliteies di ntervënc di servijes defrënc.
4. (Furné cun auti y veicui a motor)
(1) I servijes nunziei tl articul 2, coma 1, pustomes a), b) y g), y l ufize patentes dejëuj i ntervënc de prevenzion y i tratamënc saniteres de chëla persones, che ie unides anutedes per vester furnedes cun auti y veicui a motor te cundizions de cuscienza autereda da sustanzes psicoatives.
5. (Istruzion y furmazion dl personal di servijes)
- (1) A pië via dal ann de scola 2007-2008 sustën la Provinzia la vianvieda de tematiches spezifiches
sun la formes de dependënza ti programs de stude per la prufescions sozieles y saniteres dla scoles provinzieles y dla università y la mët a jì i ntervënc de furmazion per l personal di servijes saniteres y soziei publics y dla urganisazions privates acreditedes.
6. (Despusizions tl ciamp dl alcol)
- (1) L ie pruibì ti jeté su y ti vënder buandes alcoliches a chi che ne à mo nia cumplì 16 ani y a chi
che ie tlermënter ciocs, te bars, pubs, chioscs, discoteches, locai de nuet, clubs, ustaries, restauranc, butëighes, supermarcei y eserzizies semienc, y a uni moda te duc i eserzizies cumerziei, sciche nce n ucajion de manifestazions publiches, ënghe recriatives, cunzerc, festes populeres, festes sun pra y d’autra festes, manifestazions sportives, fieres y marcei, y te uni cajo te uni luech daviert al publich.
- (2) La buandes alcoliches vendudes ti eserzizies urganisei cun l sistem de venduda dl servisc liede
muessa unì plazedes spartides dala buandes nia alcoliches. Ti eserzizies cumerziei muessel unì metù ora ndicazions cun la pruibizion de jeté su y vënder buandes alcoliches a chi che ne à mo nia cumplì 16 ani.
(3) I gestëures di eserzizies y i urganisatëures dla manifestazions nunziei tl coma 1 muessa garantì la despunibltà de jeté su y de vënder, ora che la buandes alcoliches, almanco doi sortes de buandes frëides nia alcoliches a n priesc plu bas dla buanda alcolica plu a bon marcià. Na ezezion ie la degustazions de vin y i marcëi di paures. (4) L ie pruibì fé retlam per buandes alcoliches:
- a) tl cheder de programs spezifics per minorénns y chindesc menuc dan o do la trasmiscion de
chisc programs,
- b) sce l ti vën atribuì a chësta buandes na fazion o ndicazions terapeutiches che ne ie nia
espressamënter recunesciudes dal Ministere dla sanità,
- c) sce l vën mustrà minorénns che bev alcol.
(5) L ie pruibì fé retlam de buandes alcoliches tl radio y tla televijion tl orar dala 16.00 ala 19.00.
(6) L ie pruibì fé retlam de buandes alcoliches te uni forma:
- a) tla stampa da uni di y te chëla periodica per i minorénns,
- b) tla sales de chino n ucajion dla proiezion de films destinei a minorénns.
(7) L ie pruibì fé retlam de buandes alcoliches n ucajion de manifestazions adressedes a jëuni y jëunes sot ai 18 ani y te lueges che vën frecuentedes dantaldut da chisc. Sce la manifestazions adressedes a jëunes y jëuni sot ai 18 ani se dejëuj te lueges o strutures nuzedes ënghe per manifestazions destinedes a n publich adult, ne muessa l material de retlam instalà iló dureivlmënter nia unì tëut demez.
(8) I chemuns dla provinzia de Bulsan possa adoté cun n si regulamënt mesures che limitea la relasceda dl’autorisazions n cont de:
- a) retlams per buandes alcoliches, stabìi o temporeres te duta la strutures, ti mplanc sportifs y pra
duta la manifestazions,
- b) scumenciadives de arbassamënt temporer di priejes dla buandes alcoliches ti cunfronc dla
tarifes ufizieles, c) scumenciadives de promozion te duta la lueges publiches y pra la manifestazions nunziedes tl coma 1.
(9) La viulazion dla despusizions nunziedes ti comes 1, 2 y 3 vën straufeda cun la sanzion aministrativa aldò di articuli 54, coma 3 y 55, coma 3 dla lege provinziela dl 14 de dezëmber 1988, nr. 58.
(10) La viulazion dla despusizions nunziedes ti comes 4, 5, 6 y 7 y l nia avëi damandà o l nia avëi usservà l’autorisazions aldò dl coma 8 vën straufei cun na sanzion aministrativa da 500,00 euro a 1.500,00 euro. La straufonga vën radopleda pra uni autra viulazion.
(11) La pruibizions aldò dl coma 4, pustom a), aldò dl coma 5 y aldò dl coma 6, pustom a) vel mé per la emitëntes radiotelevijives locales y per la stampa locala. La pruibizions aldò dl coma 4, pustom a) y dl coma 5 ne vel nia per i programs de paejes fulestieres trasmetui dala emitëntes raditelevijives locales.
7. (Coordinamënt provinziel) (1) Pra l departimënt per la sanità y per la politiches sozieles ie istituida na unità de coordinamënt tl ciamp dla dependënzes.
(2) L’unità de coordinamënt ie numineda dala Jonta provinziela y ie metuda adum da:
- a) na persona n reprejentanza dla Repartizion provinziela per la sanità,
- b) na persona n reprejentanza dla Repartizion provinziela per la politiches sozieles,
- c) na persona crissa ora danter trëi inuemes purtei dant dala urganisazions privates acreditedes,
- d) na persona crissa ora danter trëi inuemes purtei dant dai servijes saniteres spezialistics publics,
- e) na persona crissa ora danter trëi inuemes purtei dant dai servijes soziei spezialistics publics.
(3) L’unità de coordinamënt se nuza nce dla cunlaurazion di reprejentanc dla istituzions per la junëza, dla scola, dl mond dl lëur, dl’economia y di chemuns.
(4) L’unità de coordinamënt à l duvier de lauré ora linies diretives, plans de ntervënt y proiec tl ciamp dla dependënza, de usservé l fenomenn dla dependënzes, de scrì relazions periodiches sun la dependënzes y de garantì l coordinamënt y la ntegrazion danter i ufizies, i servijes y la strutures che lëura tl ciamp dla dependënzes.
8. (Cunvenzions y cuntribuc)
(1) La Provinzia, l’aziendes saniteres y i ënc teritoriei deleghei aldò dl articul 10 dla lege provinziela dl 30 d’auril 1991, nr. 13, y mudazions suzessives, possa stlù ju cunvenzions cun ënc publics y urganisazions privates acreditedes per la gestion di servijes tl ciamp dla dependënzes.
(2) Per garantì l funzionament di servijes aldò dl articul 2, coma 1, pustoms c) y g) possa cunzeder cuntribuc per spëises curëntes tla mesura de al plu l 90 percënt dla soma lasceda pro y cuntribuc per spëises per nvestimënc tla mesura de al plu l 80 percënt dla soma lasceda pro.
(3) Per i nvestimënc sozio-assistenziei possa la Provinzia cunzeder cuntribuc aldò dl articul 20/bis dla lege provinziela dl 30 d’auril 1991, nr. 13, y mudazions suzessives. 9. 2)
10. (Abrogazion de normes)
(1) L vën abrogà:
- a) la lege provinziela dl 7 de dezëmber 1978, nr. 69, y mudazions suzessives,
- b) la zifra 1) dl pustom f) dl coma 1 dl articul 10 dla lege provinziela dl 30 d’auril 1991, nr. 13,
- c) la zifra 2) dl pustom g) dl coma 1 dl articul 10 dla lege provinziela dl 30 d’auril 1991, nr. 13,
- d) la zifra 2) dl pustom l) dl coma 1 dl articul 10 dla lege provinziela dl 30 d’auril 1991, nr. 13,
- e) la zifra 1) dl pustom o) dl coma 1 dl articul 10 dla lege provinziela dl 30 d’auril 1991, nr. 13,
- f) l coma 11 dl articul 26 dla lege provinziela dl 17 de fauré 2000, nr. 7, y mudazions
suzessives.
11. (Despusizion finanziera)
(1) Chësta lege ne cumporta nia de majera spëises a cëria dl eserzize curënt. La spëises per i ntervënc ududes danora da chësta lege vën curides per l ann 2006 cun la cuota che ie mo da garat di stanziamënc de spëisa autorisei a cëria dl bilanz de previjion dl eserzize finanzier 2006 per i ntervënc dla despusizions de lege abroghedes cun l articul 10 de chësta lege.
(2) La spëisa a cëria di eserzizies suzessives ie autorisedes cun la lege finanziera anuela.
12. (Jita n forza)
(1) Chësta lege jirà n forza n l di do chël de si publicazion tl Buletin Ufiziel dla Region. Chësta lege unirà publicheda tl Buletin Ufiziel dla Region. Duc chëi, a chëi che ti spieta, ie ubliei de la usservé y de la fé usservé coche lege dla Provinzia.
1) Publicheda tl B.U. dl 30 de mei 2006, nr. 22.
2) Remplazea l pustom h) dl coma 1 dl articul 10 dla L.P. dl 30 d’auril 1991, nr. 13.