La scassada busarada
 |
Questo testo è da formattare. | |
La scassada busarada
1.
La scassada
busarada
ch' â stafè un müt
ch' â spavënt da düt,
finamai dal Giubelèo
dô la mort del papa Lèo.
Oste l' ascoltè?
I ô pa t' la cuntè!
2.
Söla sëra
fôsc dagnëra
fêji i Ladins
propi da vijins:
ai s' abina y se sënta,
se la cunta o s' la ćianta
sciöche mai s' al dà,
finch' ai n' à assà.
3.
Mo ći moca
sc' ala i toca
ai mituns da jì
d'bota a dormì
Ai uress aldì na stôria
pur se mëte a memôria
coch' al vëgn el bàu,
ćich' al fêj el diàu.
4.
Guài sc' ai alda
bona ćialda
na te' stôria, vè!
'La ti fêj tan mè!
Ai s' la mastia y s' la rümia
sciöch' vidì na peza tümia
y se mët tel ćé
côsses che ne n' é.
5.
Vijo Frenes!
Oh ći scênes
ast' mai fat zacan
pur un te' malan!
Ćiche mai la jënt contava
Vijo tost s' imaginava.
Coche chësc gnarà
sciöch' San Micorà.
6.
'Dër les sëres,
tò spo, chëres
ch' i fajô spavënt
sc' al ne n' ê pro jënt.
Dô l' cenè y la corona
scioch' al foss te na murona
stêl ilò tachè
finch' al gnê ćiamè.
7.
Chësc martöre
al s' an möre
dala sonn chilò.
S' ioma spo dijô:
Taca sö la camijela
y les ćialzs da ćiampanela!
Vat'an sëgn sön let
pur levè dals set.
8.
Ći sciusciure
che chël mure
fêj insnöt tel sonn!
S' ioma dîj al om:
I à dormì bel püch y nia.
Sëgn, vè, mënel bel' la rjìa.
Co mìnest' mu tö,
Dessi bëgn jì sö?
9.
(Le pêre:) Pan da müfa
pro la jüfa
i à fôsc fat tan mè,
ch' al te mëss cherdè.
N' aldest', uma, coch' al scraia,
coch' al ürla, coch' al svaia
corassö sorënt?
Salt' sö iö denant!
10.
(L' ioma:) Vad' atira
bel lisìera
pur ne descedè
chi che mëss palsè.
I ô pa l' fà pluré la süa,
l' ô pa spo menè te stüa.
N' é pa nia da rì!
Fôsc ch' al [n'] é vâl' d' rî!
11.
Cun mervöia
y ria vöia
Saltla ëla snel
sö, sciöch' un vicel.
Ala va y scuta chit chit.
Ala sta y ćiara fit fit.
Mu ći riüda, vè,
ch' ëla spo se dê!
12.
Giubilèo,
Giubilèo,
ne me trà pro i pîsc!
chël pür' Vijo dîj.
N' ô pa plö diàu o mostri,
tlo pa dì bel paternostri!
I ô pa dër laurè,
mai plö santurè!
13.
Y la uma
spo ne juma
- sciöch' al' â rejun -
de ti dè l' reflun:
Müt, ći dîjt' del Giubilèo?
Che n' te dodes tö - èo!
Este propi un mot,
un de Spàpa d'sot?
14.
(L' Vijo:) Os punsede
y dijede
ći ch' orëis, pur me!
L' à pa iö purvè!
Na compagna trascassada
mai, no mai m' é gnüda dada!
Düt é plö saurì,
finamai morì.
15.
'Sta scassada
giubilada
i à mu fat tan bëgn,
ch' al confessa sëgn:
Mefodër el Giubilèo
m' à amainé sciöch' Saul Ebrèo,
spo d' un stletorin
fat un capuzin.