La polpetta del Re/Quader V
 |
Questo testo è stato riletto e controllato. | |
| ◄ | Quader IV | Quader VI | ► |
QUADER V.
La Profezia del Gran Capp di Ratt.
Ah, el gaveva reson
el Capp di Colmegnon!
El poer Scianin, in men de quindes dì,
a furia de patì
la famm, l’è stáa ridott magher, distrutt,
de parì nanch pu quell, tant l’era brutt!
Alter che i ratàtoj de robba finna
promiss in la cusinna!
El Màgol e la Strìa, per fà danée,
mangien appenna de podè sta in pée;
e figureves donch se al pover Scian
voeuren mollaggh anca on boccon de pan!
Hin già trii o quatter dì
ch’el gà bell pari lù, per fass capì,
a traggh di grand mognad!...
No ghe risponden che cont di pesciad!
Anzi ona volta lee, la vèggia Strìa,
l’ha ditt al Màgol: «Per economia,
adess che ghè pù i ratt,
nun podarissom minga mangia el gatt?»
A sti paroll, lù, subet — giuradinna! —
el Scianin l’è andáa a scondes in cantinna;
e l’ha giuráa de no moeuves de là,
e de lassass creppà,
puttost che ne borlaggh dent in la bocca
al porco Màgol e alla soa lifrocca.
Màgol-Magasc,
che te poda s’cioppà el petasc!
E tì, brutta Strìa,
che te staghet cent’ann in agonìa!