Il Vangelo di S. Matteo volgarizzato in dialetto bergamasco/Capo V
 |
Questo testo è completo. | |
| ◄ | Capo IV | Capo VI | ► |
Capo V.
2 E’l dervia la sò boca, e’l gh’insegnaa, disendoghe:
3 Beac i poerec de speret: perchè ol regno di siei l’è so.
4 Beac i mansüec: perchè lur i posederà la tera.
5 Beac quei, ch’i löcia: perchè i sarà consolac.
6 Beac quei,ch’iga fam, e sit: perchè i ghe la scödirà.
7 Beac i misericordius: perchè i troarà misericordia.
8 Beac quei, ch’i ga ol cör net: perchè i vedrà ol Siur.
9 Beac i pasefech: perchè i sarà ciamac fiöi del Signur.
10 Beac quei, ch’i soporta di persecusiù per amur de la giöstesia: perchè ol paradis l’è prope sò.
11 Voter si beac quando i omegn i ve maladirà, e i ve perseguitarà, e i dirà falsamet de oter töt ol mal, in causa mea:
12 Stè sö alegher, balè de consolasiù, perchè grand a l’è ol vost premio in paradis: perchè icsé i à perse guitat i profeti, che i era al mond prima de oter.
13 Votera si ol sal de la tera. Che se ol sal al deenta fat, cosa a s’dovrarà de salal? No l’è piö bu de negota, föra che es bötat vea, e pestat sö da la zet.
14 Voter sì la lüs del mond. Ne s’pöl scondi öna sità piantada sura ü mut.
15 Se s’impisa la lüserna, ne s’la met sota ’l ster, ma söl candeler, perchè la fase ciar a tota la zet de cà.
16 Icsé al sberlüse la osta lüs denac ai omegn: perchè i vede i voste opere bune, e i glorifiche ol voster Pader, che l’è in paradis.
17 Ne stè a cred,che mé sies vegnit per bötà in malura la lege, e i profeti: no só egnit per bötala in aria, ma per eseguila.
18 Perchè mé del de bu ve dise; che seno la pasa ol siel e la tera, no la oltrepasarà ü nigher d’ongia, o ü fél sul la lege, prima che töt no’l se sies compit.
19 Ognü doca, che ’l trasgredirà i de ste comandamec ol piö picol, e ’csé l’insegnarà ai omegn, al sarà ciamat ol piö picol nel regno di siei: ma colü, che l’avrà operat e insegnat, al sarà tegnit grand nel regno di siei.
20 Perchè mé ve dighe, che se la osta giöstesia no la sarà piö masesa de quela di Scribi e di Farisei, voter no entrarì in dol regno di siei.
21 Ì sentit cosa al gh’è stac dec ai nost vec: No stė copà vergü: e chi avrà copat, al sarà colpeol inac a la giöstesia:
22 Ma mé ve dighe, che töc quei, ch’i ardirà contra del sò fradel, i sarà colpeoi in giödese. E chi avrà dec al sò fradel, raca: al sarà reo denac al conses. E chi i avrà dec, sioco: al sarà meriteol del föch de l’inferen.
23 Se té doca te sté per fà l’oferta a l’altar, e là al te é in met, che ol tò fradel al ga vergota contra de té:
24 Met lé la tò oferta denac a l’altar, e cor a fà pas prema col tò fradel: epo turnaa fà la tò oferta.
25 Combinet prest col tò nemis intanta che te sé con lü in strada: perchè per disgrasia ol tò nemis nol te daghe in mà al giödes, e ol giödes in mà al ministro: e te siet casat in prezù.
26 Te dise del bu, no te egnaré föra de là, prima de i pagat fina a l’öltem sentesem.
27 ì sentit cosa alghe fü dec ainost vec: No stè fà adülterio.
28 Ma mé dighe: Che töc quei, ch’i sberlögia öna fomna per desiderala, i à za cometit nel sò cör adülterio con lé.
29 Che se ol tò öc dester al te scandaleza, cael fò, e bötel vea: perchè l’è mei per té, che al vaghe in malura öna part del tò corp, che es bötat töt intregh in de l’inferen.
E se la tò mà drecia la t' avrà scandalezat, tajela zo, e bötela vea: al sarà mei per té, che te perdet öna part del tò corp, che ’ndà con töt a l’inferen.
31 L’è stac dec amò: Töc quei, che i rimanda la sò moer, i ghe daghe ol libel del ripüdio.
32 Mamé ve dighe, che töc quei, ch’i rimanda la sò moer, föra che per adülterio, i la fa deentà adültera: e colü, che l’ispusa la fomna ripüdiada, al comet adulterio.
33 Ì sentit amò, che l’è stac dec ai nost vec: No stè a violà ol züramet: ma mantegni al Siur, quel che i zürat.
34 Ma mé ve dighe de no zürà in nisöna manera: ne per ol siel, perchè a l’è ol trono del Siur:
35 Nè per la tera, perchè al’è ol scabel de lü:nè per Gerüsalem, perchè a l’è la sità del gran re:
36 Nè te zürarè per la tò crapa,perchè té no te pö det fà bianch, o nigher ü di tò cheei.
37 Ma ol vost parlà al sies: A l’è icsé,o cso :no l’è icsé , nè cso: perchè ol de piö a l’è ü mal.
38 Ì sentit cosa a l’è stac dec: Öc per öc,e dèt per det.
39 Ma mé v’dighe de no stà apröf al catif: ma a colü, che’l te daghe öna s’ciafa da öna banda del mostas, té oltega quel’otra.
40 E a colü,che al völ tacà lite con té, e töt la tò tonega, sedega ol tò mantel.
41 E se ü al te tirarà dré per ü mea a cor, va con lü du mea d’oter.
42 Da a töc quei, ch’i ten sirca: e no oltega ol müso a colü, che al völ, che te gh’imprestet vergota.
43 I sentit, che al fü dec: Te völiré bé al tò prosem, e te odiaré ol to nemis.
44 Ma mé ve dighe: Amè i vos’c nemis,fè dol bé a colur, ch’i ve odia: e preghè per quei, ch’i ve perseguita, e i ve calünia:
45 Perchè sief fiöi del Pader vost, che ’l sta in siel: che al fa nas ol sul sura i bu e sura i catif: e’l manda l’eigua per i giös’c e per i bricù.
46 Perchè se amarà quei, che i ve ama, che premio gavrif? no fai tat d’oter a’i püblicà?
47 E se salidarà noma i vos’c fradei, cosa fef de piö di oter? no fai tat d’oter a’i pagà?
48 Sié doca voter perfec, com’a l’è perfet ol Pader vost, che al sta sö in siel.