Historias dil munt sogn Gieri/21

../

../ IncludiIntestazione 29 ottobre 2019 50% Da definire

Historias dil munt sogn Gieri Historias dil munt sogn Gieri

La princessa, che ha bugen siu bab sco il sal.

Ei era in barun en nossa tiara
2900 Cun treis mattauns. E quel in di empiara:
„O caras feglias, con bugen mei veis?
Schei en semeglias, sco vus manigieis!“
La veglia a siu bab dabot declara:
„Sco en mes egls la popa glischa clara.“
2905 E la mesauna di cheu denter en:
Ual sco memezza jeu hai vus bugen.“
La giuvna dat risposta cul verbal:
„Jeu carezeschel vus, o bab, sco sal,
Il qual dat allas spisas mur, savur.“
2910 Cuntents cun las empremas ei' l signur.
Nuidis aud' el d' esser carezaus,
Mo sco il sal — E sur de quei vilaus,
El catscha ord la casa la giuvnetta,
Che sto girar el mund uss tut suletta.
2915 La giuvna va giuado per la vallada,
E sesa sper in lag fetg contristada.
In pesc neutier senoda e salida
La viandonta biala, mo pallida:
„Jeu sai, pertgei vus essas bandunada.
2920 Mo vus vegnis ad esser fortunada.
Teni las larmas e tschaffei fidonza!
Mei en la tiara della vischinonza,
Il retg de Frontscha dat a vus in plaz
El grondius e magnific palaz. —
2925 Treis scatlas silla riva cheu veseis,
Sin via quellas vus en bratsch porteis.
Mo jeu vi ver a vus recommandau
Ded arver ellas mo cu gliei firau,
A messa las domengias cu vus meis
2930 En la caplutta sontga ed oreis,
Leu nua che Luis il retg orava
E las reliquias sontgas honorava.“ —
Il retg de Frontscha ha priu si en casa
La biala giuvna sco per fumitgasa,
2935 Che sto lavar tigliors, perver gaglinas
E far de tuttas sorts en las cuschinas.
La matta en survetsch uss maine plira:
Ei vegn dumengia e tgei vestgadira
Trer en per ornament sur tgau e spatla
2940 Pertratga ella. E l' emprema scatla
Ell' arva, sco il pesc ha commandau:
Vestgiu de seida fin e gartigiau
Ell' anfla e till' en cun legherment
Ed ei contenza giud quei ornament.
2945 Sin l' insla en il flum ei baghegiada
La capluttetta sontga fin ornada;
Cul pievelet va era la dunschala
Tras biala porta e lu si per scala
E ves' il tempel en l' alzada sura,
2950 Fenestras aultas, graschlas de structura,
Colurs dagl artg en tschiel fin imitadas —
Las sontgadats e statuas bein ornadas.
A messa vegn, cu ei d' ensemen tucca
Il fegl dil retg e va en ella trucca,
2955 Va sper la matta vi en seida fina
E mir' en quella fatscha ton carina.
Cu la funcziun ei stada strusch finida,
A casa ei la giuvna spert untgida;
Il fegl dil retg ha buca pudiu ver,
2960 Nua che quella mondi a maner.
En la secunda scatla ha la matta
Anflau mondura aunc pli delicata.
Sin ella en baselgia ha mirau
E suenter messa spert lu plidentau,
2965 Il fegl dil retg, che ha cun grond plascher
Sco spusa ella voliu obtener.
La tiarza scatla ha la fortunada
Aviert il di de nozzas tut beada,
Vesend igl aur cusiu en il vestgiu —
2970 Il pesc per ussa ha la benediu.
La spusa ha tratg en quei ornament
E paradava enten quel stupent.
Il vestgiu seida ha la spusa dau
A quella, che siu spus ha compognau.
2975 Tier il giantar de nozzas envidaus,
Ei il barun da lunsch er' arrivaus.
La spusa tut discus lu ordinescha,
Che sal, che tuttas tratgas schlioc cungescha,
Ins astgi buc smiul oz applicar. —
2980 Las spisas eran fatas de schigiar —
Ils loschs cambrers uss puplau cun raschun;
Puplond empiar' igl jester, gliez barun:
„O spusa, schei, pertgei negina mur
Las spisas han sin meisa ded honur?“
2985 La spusa el vestgiu ded aur sto rir,
E dat rispost' al bab barun cun dir:
„Ei maunca mo il sal, il savurus,
Il sal, sco' l qual jeu carezeschel
vus!“
Uss sesmerveglia il signur barun
2990 E roga sia feglia per perdun
Per igl entiert encunter ella fatg;
Ed el ha giu da lu igl avantatg,
Ded esser dalla giuvna carezaus
Pli fetg che dallas autras, en tuts graus.
2995 La giuvna ei lu stada ditg regina,
Sch' ell' ei ca morta, viv' ell' aunc adina. — — —
Sin la dunschala veglia, Turtè de Lumerins,
L' egliada ussa drezzan ils hosps e consanguins,
Ses frars ein en Surselva ministers digl uestgiu,
3000 Las tuors episcopalas han ditg e bein regiu.
Ed ella ei vegnida da quort or da Lumbrein
E sa sco Mariarta tschien praulas bunamein.