Fiabe e leggende della Valle di Fassa/1
 |
Questo testo è incompleto. | |
| ◄ | Fiabe e leggende della Valle di Fassa | 2 | ► |
De Rossi, Hugo: MÄRCHEN UND SAGEN AUS DEM FASSATALE. Aus dem Nachlass herausgegeben von Ulrike Kindl. Vigo di Fascia, 1984. xxx = {RoM}
{RoM 48}
• Maria del cender
L era un om e na fémena che i aea na tousa, che aea ad inom Maria e aea per nona la Madona. Chista fémena é morta e chel om l se à ndò maridà. Le vegn a aver trei touse. Chista pera Maria la era trata vin de do. Pech regolada, che no la podea nence jir a messa grana. E le autre fornide, le jia semper a messa grana. Maria cognea 'ntant tizar sot l'orc. {RoM 49}Le vegn le feste de Pentecoste de Me e la à cognù ster a ciasa. Ntant messa grana la se à metù a pianjer, che la era arbandonada. E l é vegnù sà nona. L à domanà cheche l à. Ela l'a dit: "Vedede ben nona, mie sor le é a messa e gio cogne star a ciesa." E la nona l à dit: "Te Maria sta bela viesta e va a messa e più da vejin da tie sor e miec l é." E Maria la é jita e la se à metù a pede sie sor. Ele no l à più cognosciuda con chela bela viesta. E Maria perché so nona ge aea dit che a l ultim evangele la sin vae sobita, la se n é jita a tizar sot l'orc e so nona é sin jita. Le é vegnude da messa e le à dit: "O Marietta chega a cender, n cender te on lascià e n cender te on troà. Noi on pò vedù na bela signora te messa." E Maria: "Se fosse po stata gio. - Che aeste dit? - Che che che é dit: Voscia bocia val n schit." Ndoman le é ndò jite a messa, e l'autra a tizar sot a l'orc. E l é ndò vegnù sa nona. E la ge à portà amò na più bela viesta. "E vàtene da vejin da tie sor, più davejin tu rue, più miec l é. E can che l é l'ultim vangelo, fa desche ngern. Veitene a ciasa coran." E la é vegnuda da messa e cet. L terz dì le é ndò jite e Maria tizaa sot a l'orc. L é vegnù so nona l'a ge à portà amò na più bela viesta e la ge dat n anel de or e l à dit: "Da l'ultim vangele tirelo su per gejia e varda chi che l' coi su." E l é ruà ten stival den signor. Chis signor l à coet su l'anel e l à vardà chi che l'à tirà. E l à vedù sen jir fora de lejia sta bela signora e l é jit a veder olà che la va, e l à vedù che la sen va te chista majon. E le sor le é vegnude da messa et cetera. Ntant che i marenaa l'é ruà l' pare de chis signor col fi e l gie à dit: "Voi aede na bela tousa che ge piasc a mi fi." E nlauta la mairigna de Maria l à dit a la più veia che la se vestisce bela e la se lasce veder. Can che l'é vegnuda l signor l à dit: "No l é chista. No l é chista." Se à vestì la seconda e l é stat l'istesc. Se à vestì la terza e l é stat l medemo. Dapò la mairigna l à dit: "Non on de autre, auter che na burta te cender che tiza sot l'orc." {RoM 50} E l signor: "Lasciamela veder." E Maria se à vestì co la più bela viesta de sia nona e l' signor l à dit: "L é chista". E tous l' se l à touta e l' se l à maridada.