El papagal de Venezia.

ladino

El papagal de Venezia. Intestazione 13 marzo 2016 50% Da definire

El papagal de Venezia.


Doi Fodomi en puoch de temp, propio de chi da “zacan” che ava velch amia el muot, i s’ à pensé de ji a una a vedei Venezia. Cast l’ eva ʼntourn l’ an 1840. I sen é pièi via a pè ju per el cianèl de Egort e, ʼncan montèi, ʼncan a pè, davò en valgugn dis i è ruèi a Venezia. Da sara, ben strac’ e plens de imprescion de dut cal che i ava vedù, i è jus a se cherì da d’ albierch. Per se dè plu ʼmportanza e no dè da cugnasce da ulà che i eva, en tant ciana i descorova todasch, e i è stei servis ben polito con dute le bele maniere. Ma ʼn te sala metù en te na gabia, l’ eva ence en bel papagal, che forsci ence d’ al bele en louta el capiva che i sciori en tant ciana ie plesc ester divertis con velch musica. En louta no n’ eva ʼncora el fonografo, e ʼntant duta la ciana el papagal seguitova a cianté “Porchi tedeschi, porchi tedeschi!” Sti doi fodomi i à capì che la lezion ie steva ben, ma per no ester coionèi, un el disc a la parona: Cotant volei-so sun cal papagal? La parona per no volei el vane la s’à pensé de damané en sproposito! 60 corone. El Fodom tira fora el tacuin e el disc: Chilò èi le 60 corone! metè-lo en te fana, che ence se è bele cené, me l’ mange delongo!