Compendio biblico in lingua genovese/Chì se contèm como Adam fo cassao fora de lo pareizo teresto e como ello ze in Ebrom
 |
Questo testo è completo. | |
Chì se contèm como Adam fo cassao fora de lo pareizo teresto e como ello ze in Ebrom
| ◄ | Chì se contèm so che lo nostro segnor Dee disse a Adam per lo peccao che o fe | Chì se contèn la generacion le quai fon VIIII e fo la prima hetae | ► |
Chì se contèm como Adam fo cassao fora de lo
pareizo teresto e como ello ze in Ebrom
Q
uando Adam fo in la valle de Ebrom ello comenssà a vive de lo so afano e ave doi figij1, so fo Abel e Caim, che per caxom de lo sacrifficio de le bestie o cresè invidia de Caim inver Abel, persochè Abel offeriva de le megioi bestie che ello avesse, e Caim, chi lavorava la terra, si offeriva de le pu grame che ello avesse ni conossese, e persochè Dee agoardava a la offerta de Abel e de Caim non, e Caim n'ave invea, per che ello osize Abel so frai, e, dapoi che o l'ave morto, lo nostro segnor Dee disse a Caim: "Caim unde e to frai Abel?". Respoze Caim: "Mi son-e goardiam de me frai?". Alaora lo nostro segnor Dee disse a Caim: "La voxe de lo to frai Abel, soè lo to sangue che ti ai spainto sum la terra, si a criao a mi, ma quando me parà e ge darò vendeta". E per quello dolor de la morte de Abel Adam pianzè cento agni e non se acostà mai a soa mogié, inpersochè messé Ihu. Xe. non vorea che nasse de la marvaxe semenssa de Caim. E quano[sic] Adam ave pianto cento agni, si vegne l'angero e si ge comandà che ello devesse uzá con soa mogié. E lantó ello ave um figio a lo qua o misse nome Seths, e questo Seth si fo in logo de Abel, e de lo linagio de questo Seth si nassè la nostra Madona santa Maria de la quá o nassè lo nostro Segnó messé Ihu. Xe. Quando Sath ave cento agni Adam era za vegio e incresevage la vita, e um jorno, seando stancho per monti erbori che ello avea tagiao, ello se botà con lo peto in terra sum una ihapa e incomenssà a pianzere [sic] e a penssá in li grandi mai che ello veiva cresse in lo mondo, e cognossè che tuto questo era per lo so peccao, e si jhamà so figio Seth lo qua ge fo incontenente davanti, e si ghe disse: "Figio, vatene a lo pareizo teresto e trovere' lì lo angero cherubim chi è goardiam de la porta e goarda a lo intrá de lo pareizo si è lo erboro de vita, e a in man una spá de focho, e quella goardia fo faita dapoa che foi casao de lì con toa maire per le nostre peccai". E Sath respoze a so paire: "Mostrame la via unde e dum andá a lo pareizo teresto e so che e dum dí a lo angero". E Adam ge disse: "Per questa vale tu troverai via averta e le peañe chi fon de li mei pé e de toa maire chi sum seche e marse, tanto fo grande lo nostro peccao, e persò e fomo zitai de lo pareizo, e li unde e scharchizamo con li nostri pee o no ge nassè possa erba, e per quelle peañe anderai a lo pareizo e dirai a lo angero cherubim che o me incresse de vive e che ello me mande de l'orio de mizericordia che lo nostro segnor Dee me inpromisse quando o me cassà fora de lo pareizo". E quando Sath inteize lo comandamento de so paire e ello incomenssà de andá, e quando ello fo a lo cavo de la valle, si ge trovà le peanne de so paire e de soa maire chi eram seche a modo como o ge aveiva dicto Adam so paire. E seando a la porta o fo spanvento de lo grande sprendó chi insiva fora de lo pareizo, e acostandose a l'angero cherubim, e l'angero vegne a ello e si ge disse: "Sath che demandi-tu?" e Sath si ge disse: "A me paire Adam si ge increse vive e si me [a] mandao a ti a pregate che ti ge mandi de l'orio de la misericordia che Dee ge inpromisse quando o lo cassà fora de lo pareizo teresto". E l'angero ge disse: "Meti la testa dentro e goarda bem so che ti veirai". E Sath ze a la porta, cossì como l'angero ge disse, e misse la testa dentro, e vi in mezo a lo pareizo una fontana grande de la qua insiva quatro fiumi grandi, chi su principai, a li quai noi digamo, zoè, a lo primé Eiron, a lo segondo Cim, a lo terso Tigris, a lo quarto Eufates, e inpen tuta la terra de aigoa, e apè de quella fontana si g'era um erboro monto grande e monto pin de rami, e questo erboro non avea ni scorsa ni foggia, e Sath agoardà a quello erboro e disse infra si mesmo che quello erboro era cossì scorsao per lo peccao de so paire e de soa maire, e cognossè le lor peanne, e visto questo si se ne tornà a lo angero e si ge disse tuto quello che e l'avea visto, e lo angero si ge disse che o ge tornasse una atra fiá, e ge tornà, e ge misse la testa como e l'avea faito avanti, e vi che lo erboro tochava con la cima lo cel, e in la cima de lo erboro vi stá um fantim lo qua parea che pianzesse. E Seth asbasà li ogij, e fe questo per lo erboro, e ave vergogna, e vi le rame de lo erboro chi pertuzavam la terra e tochavam dentro da lo inferno, e cognosè l'anima de so frai Abel. E poa o tornà a lo angero cherubim e contàge so che ello aveiva visto, e lo angero ghe disse: "Ai-tu visto quello fantin? Saihi como quello è lo Figior de Dee chi pianze lo peccao de to paire e de toa maire, e ello lo destruerà quando sarà lo tenpo, e quello si e lo orio de la mizericordia che lo nostro segnor Dee promise a to paire Adam quando o li casà de lo pareizo". E quando Sath se ne vosse andà, lo angero ge dè tre' grane de la semenssa de quello erboro e de lo fruto che avea mangiao so paire e soa maire e si ge disse: "Quando tu sarai a to paire, a lo terso di che tu lo sotererai, metige queste tre' grane in bocha e sote la lengoa". E Sateche [sic] se ne tornà a so paire con queste tre' grane e contàge so che lo angero ge avea dicto, e, quando Adam odì che o devea morí, si fo monto alegro e si incomensà a rie, che in tuto tenpo de soa vita o non avea rizo, e levà le main a cel e disse: "Segnor, se ve piaxe, trai l'annima mea, che e sum asai vischuo[sic]". E a cavo de li trei di, Adam morì, e Seth so figio si ge misse quelle tre grane de quella semenssa sote la lengoa, cossì como lo angero ge aveiva dicto, e si lo soterrà. E, de li a pocho tenpo, quelle tre grane si nassèm, e, de li a pocho tenpo, si fem tre verge, le que' aveam piaschuna um braso de longessa. E, de quelle verge, l'una era sèdoro e l'atra cipreso e l'atra parma, le quae significha lo Paire, lo Figio e lo Spirito Santo. Lo sedoro e lu pu ato erboro chi sia[sic], e quello significha lo Paire, lo cipreso e lo pu oritozo erboro chi sia, e quello significha lo Figio, e la parma chi e spessa de fogie significha lo Spirito Santo, persochè a fa lo fruto doce. E quelle tre rame stem in la bocha de Adam fin a lo tenpo de Noe. Or avei aora odío como Adam morì e, depoí ello, si romoze[sic] Seth so figio mao in la generaciom.
Note
- ↑ Fino a pag. 38 una j è stata aggiunta in fondo alla parola figi.