Ö pappagallo de moneghe/Parte terza
 |
Questo testo è completo. | |
| ◄ | Parte seconda | Parte quarta | ► |
Avieì tûtti osservôu, succede spesso,
Che se l’ommo ö se trêuva in to ballon,
Ciù ö l’agisce pe drïto e pe refesso,
Ciù ghe pâ che ghe cresce da raxon,
5Ma a pittin a pittin, ven che ö finisce
Con dì: ho fæto ûnn-a balla e ö ghe patisce;
Coscì a-ö Loro, ghe paiva in to venin
Ghe n’andasse di belli ancun a lê,
Quando voendolo mette in to stoppin
10A-ö Canonego, ä Maddre, a-ö Monestê,
Ö l’ha fæto l’eroica decision
De piggiâ ö liscio con sätâ ö barcon.
Ma ûnn-a votta de fêua, lì sölo ermitto
Pedonnando da ûn teito a ûn fûmmaiêu,
15A pittin a pittin, l’idea do pitto
Calmando a bile che ö l’aveiva in chêu,
A gh’ha misso ûnn-a certa scagaboggia
De n’aveì lì per lì, fæto ûnn-a coggia.
E sta coggia a cresceiva in proporzion
20Che aumentava a bazinn-a e fàva scûo,
E a locciava, crescendo, a decision
De voeì vinse ö so punto e tegnî dûo,
E de moddo che a forsa de locciâ
A se ne andæta c’ûnn-a micellâ.
25E tra lê renegando e a mal’invïo,
No voendo ammette de tornâ inderrê,
Ö se mette in cammin, fûto, avvilïo
Piggiando a direzion do Monestê,
Ma ö se perde, ö s’imbroggia, ö s’imbarassa
30In ti vasi e ö bersô d’ûnn-a terrassa.
Sta terrassa a l’ëa, comme de raxon,
Ö grammo sfêugo d’ûn appartamento
Da poco tempo in ça dæto a pixon
A ûn Tizio, che pe ö so temperamento
35No çerto in voxe d’eccessiva flemma,
Ö se ciammava Capitan Giastemma.
Quando ä mattin, doppo ûnn-a nêutte in gianco,
Gïando sempre tra i vasi e in scì ortiggêu
Ö povëo Loro, pin de famme e stanco,
40Ö l’ëa lì arröbonôu comme ûn rissêu,
Ö vedde vegnï a serva in sciä terrassa,
Rossiggiandose ûn tocco de fûgassa.
Quando se dixe a forsa do destin!
Spesso ûnn-a balla sensa conseguensa,
45Ûn fæto da fâ rïe scinn-a i pollin,
Ö l’ha spesso in sce noï tanta influensa
Da cangiâne de stato e de natûa
Da fâne a vitta façile o fottûa.
E coscì da sta cösa inconclûdente
50Comme saìva ûn tocchetto de fûgassa,
Ö Loro ch’ëa vissûo felicemente
Scinn-a a quello sò incontro in sciä terrassa,
Ö s’é misso a piggiâlo in to stoppin
Pe ûn fatale reverso do destin.
55Ma cöse voeì? se gh’é de mëzo a pansa
Ghe zûghieivo che ûn santo ö fæ peccöu
Coscì ö Loro, che in atra circostansa
A vedde quella serva ö sæ scappôu,
Quello pö de fûgassa a te-ö tegniva
60Lì fermo a ammiâla ed a collâ a saliva.
E veddendo che a serva a tïava zù
Boccoin sovra boccoin da fâ spavento,
Pe a puïa che presto a no n’avesse ciù,
Se a giasciava con tanto sentimento,
65Ö se fæto do chêu, e ö se misso a crià,
— Da papà, povëo Loro, da papà!...
Sta chì, sentindo quarchedun parlâ,
Ghe ven sûbito a pelle de galinn-a,
A se ferma ìn sce l’atto de giasciâ,
70Dando intorno ûnn’êuggiâ co-a bocca pinn-a,
E vedendo ö Loritto a caccia ûn sbraggio:
«O Madonna, Segnô, gh’é ûn pappagaggio!»
A no sâ comme fâ... a vorriæ piggiâlo,
Ma tant’é a no s’azzarda e a no se sente;
75Pe a puïa che ö scappe a no vorriæ lasciâlo
Pe andâ zù in casa e fâ vegnì da gente,
E in te questa inçertezza, a giascia, a crïa,
A s’ingorfa, a s’accosta, a se retïa.
Ö povëo Loro, ö stava lì imbessïo
80Desfigûando sta serva invexendâ,
Che invece d’accostâse a dâghe ö dîo
A corriva in ça e in là tûtta sciätâ,
E ö no poeiva capì comme ûnn-a figgia,
Quando a vedde ûn óxello a no se-ö piggia.
85E ö çercava de dâghe da capî
Con locciâghe da testa e sbatte de äe,
Che ö l’ëa paxe, e affiggiuôu comme ûn sisî
E façile a acciappâ ciù che no päe,
E scibben che ö l’avesse do volûmme,
90A groscessa a l’ëa poi, tûtta in te ciûmme.
E con tanta eloquensa e sentimento
Ö l’ha fæto a so mimica, che lê,
Rimettendose ûn pö da-ö so spavento,
A passetti e cö andâ in punta de pê
95A s’accosta... a se ferma e cianciannin,
A s’azzarda a toccâlo ûn pittinin.
Ûnn-a votta toccôu, l’é vinto ö zêugo,
E lê furbo; no solo ö-a lascia fâ,
Ö se cincia, ö se presta, ö se da lêugo,
100Che a ghe göde, che a-ö torne ûn pö toccâ,
Poi d’ûn botto, aspëtou che a pöse ö dïo
Ö ghe monta in sciö brasso in t’ûn asbrïo.
Questa chì che ûn öxello coscì grosso
A n’aveiva mai vïsto, nè toccôu,
105Tûtt’assemme veddendoselo addosso
Co-a so pèsta de becco attennaggiôu,
A s’é vista fottûa, a s’é missa a criâ:
«O möæ santa, ghe l’ho, son rovinâ.»
E veddendo, da-a puïa, za averto ö taggio,
110Sciortì ö sangue e corrighe tûtto zû
A sbraggiava: «Scignôa gh’é ûn pappagaggio,
«Presto scià côre, scià camminn-e sciú!
«Scià me ö leve d’addosso, ahi che ö m’addenta!
«Ö m’ammassa, ö me sguara, ö me scarpenta.»
115E co-a testa inderrê, cö brasso steiso
A l’ammiava ö Loritto pe refesso,
Che ö l’ammiava lë ascì, fûto e sorpreiso
De n’ëse ciù piggiôu pe quello stesso
Che ö demoava e Sorelle a ciù no posso
120Quando pe caxo ö ghe montava addosso.
Tûtt’assemme se sente ûn sacranon
Fâ tremâ tûtta quanta a terrassetta,
E ven sciù giastemmando ûn cagnastron
Despuntôu, sensa scarpe, in camixetta,
125Che ö se mete a sbraggiâ — Cos’eì Marinn-a,
Che ve vira pe-a... testa stamattinn-a?
Cöse l’é tanto fö? Voeì che ve preghe
Ûn fûlmine de dïo, fæto a cappello?
— Scià-ö pigge pe caitæ! — Ma che ö ve neghe
130Cöse l’é? — Sciä nö vedde, ö l’é ûn öxello
— E pe ûn öxello eì da fa tanto sciäto?
No n’eì mai mansinôu, per Dio S... —
Poi, (m’immagino zà, che avieì capïo
Che ö l’ëa ö famoso Capitan Giastemma)
135Ö ven avanti dando a mente in gïo
C’ûnn-a çerta andatûa proprio malemma,
Ö vedde ö Loro, e ö dixe: — Ah sac...!
Te l’arrembo in ta poppa in mæ zûamento.
E agguantandose a ûn bacco de spassoïa
140Ö vêu mette in effetto a so minaccia,
A Marinn-a a se spaxima, a ghe crïa
— No, no padron, che scià me ö da in sciä faccia.
Sciä l’acciappe co-e moen, mi no son bonn-a...
— E no seì comme fa, brûtta côggionn-a?
145Bezêugna che ve mostre a-a vostra etæ
Comme se fotte pe agguantâ ûn öxello?
Ma mi ho puïa, perdiesann-a che n’aggæ
Fæto mai atro che dêuviâ ö cannello!
Sac...to ghe vêu tante luçïe?
150Beneito segge chi v’ha fæto e die. —
E primma che ö Loritto imbarlûgôu
Da-i crï da serva e i motti do baccan,
Ö s’addescie, ö parpelle, ö piggie sciôu
Pe scappâghe da-e ciöte e fotte ö can,
155Ö se sente ciantâ due dïe in to collo,
E mette a-ö passo sensa poeì dâ ûn scrollo.
E lì de trinca portôu zù da basso,
Dove in mezo a ûnn-a streûppa de pivetti,
A padronn-a ciù drûa che ûn canevasso
160A pessava marioli e gipponetti,
E fottûo, ciú che misso in t’ûn gaggiêu,
Che ö l’aveiva servïo pe ûn roscignêu.
Da sto punto cominsa l’ödissea
Di so mali, de so tribolazîon;
165Mi no çerco de dâvene l’idea
Pe no fa de noiose descrizîon,
Ve baste solo, che se ö poæ ö l’ëa fëo,
I atri ëan maccie e carzëu tûtti da reo.
Despëti, micellæ, tiâte de côa,
170Baciccole da mette in strambælon.
Sbraggi e famme pe conto da scignôa,
Sacramenti pe conto do padron,
In totale ûn inferno, ûnn-a galëa,
Tempiâ solo da-e frasche da camëa.
175E da questo ve lascio immaginâ
Che razza de lezioin, che dizionäio
A ûn pö pe votta ö l’ha dovûo studiâ
Pe addattâghe a so lingua, ö so frasäio,
Combinando giastemme, avemarie,
180Sacramenti, fioretti e litanie.
Ma omai l’é tempo de vortâ inderrê
E finî questa longa digrescion,
Ritornando da cappo in Monestè,
E dipinzive ö stato e a condizion
185De quelle figge, quando han constatôu
Che l’öxello do Paddre ö l’ëa scentôu.
Cöse voeì che ve digghe! in questa vitta
Pe salvâse da-i crûzï e da-e pascioin,
Bezêugneiva fâ comme ûn eremitta,
190Interdîse e ciù semplici emozioîn,
E i piaxeì che s’inventa e se procûa
Questa nostra carogna de natûa.
Gh’é çerte cöse poi, çerte demoette
Che ûnn-a votta assazzæ se ghe ritorna,
195E quando s’é obbligæ de fâ croxette,
Ne ven sempre ciû côæ de fâe torna,
In manëa che ne pâ de stâ in scë braxe,
E sensa quelle non s’ha ciù de paxe.
Coscì lö ch’ëan vissûe scinn-a a quest’öa,
200Senza öxelli in tranquilla solitudine,
Piggiôu gûsto ûnn-a votta a stà demûa,
No ne pueivan lasciâ ciù l’abitudine,
No saveivan trovâ ninte de bello,
Se no gh’intrava ûn pittin d’öxello.
205Appenn-a che a conversa de cuxinn-a
A s’é accorta che ö Loro ö l’ëa scappôu,
Gh’é vegnûo tûtta a pelle de gallinn-a,
A n’ha vìsto ciù nìnte, a n’ha ciù ansciôu,
Poi, convûlsa alleitando i beati e i santi,
210A s’é missa a çercalo in tûtti i canti.
Comme fâ, comme dì, comme se poeiva
C’ûn’atro pægio, riparâ sto danno?
Ma lê öxelli, se sa, che a no n’aveiva
Da sostituilo e fâ passâ l’inganno,
215E poi, tûtte savendone a mesûa,
Avievan rilevôu quell’impostûa.
A forsa de tiâ zù santi d’in çe,
Te ghe ven ûnn-a bella ispirazion,
Giûsto appunto gh’ëa ö Paddre in Monestê
220Che l’ëa fissôu ö giorno pe-a confescion,
E lê sûbito a piggia a balla a-ö botto
A te ghe cöre e a se ghe mette sotto.
E ancon primma che ö Paddre mäveggiôu,
Ö fesse l’atto per arvì ö sportello,
225A ghe sbraggia — perdon do mæ peccôu,
Scià me consegge, mi n’ho ciù l’öxello...
— Ma che öxello, scusæ, mi no capiscio.
— Ö l’ha piggiôu, comme se dixe, ö liscio.
— Oxello? ö liscio? comme sæiva a dî,
230Cöse l’é sto linguaggio e sto frasäio?
Ma spieghæve, parlæ, fæve capî,
Ve pa ö moddo de sta a-ö confescionäio?
Cöse son queste smanie e sto peccôu?
— Ö Loritto... — Ebben cöse? — Ö l’é scappôu.
235— Ö perdiana! ghe voeiva ö cavastrasse,
Stemmo a vedde ö l’é questo ö gran peccôu?
— Ma ö l’é ö so — Cöse voei che me ne fasse;
Di ch’eì sempre ö çervello invexendôu,
Chi gh’é ö male, e ö vëo punto de partensa
240Da doveî fane ûn caxo de conscensa!
— Comme ne sciorto!... — Mi me ciammo Zane;
L’ëi fæta a stoppa? ebben pensæghe voi.
— Scià me dagghe ûnn-a man pe poei trovâne
Ûn’atro pægio! — Comme saiva a di?
245L’é presto dïto, dæme ûn’atro öxello!
Quante voei che n’avesse? ûn pe cavello?
Ecco cöse vêu dì fä di regalli
De quella sorte a chi no i sa apprexâ;
Poeivan gödise ö re di pappagalli,
250E questa scemma a l’ha lasciôu scappâ
No basta aveine coæ, se no se sa
Tegnisene de conto quando ö s’ha! —
E sbattendoghe in faccia ö portelletto,
Ö te a lascia lì quæxi in convûlscion,
255E ö va da-a Sûperiôa che a l’ëa in coretto
Tûtta attenta a fâ a so preparazion,
E ö ghe sbraggia: — L’öxello che gh’ho dæto,
Dove diascöa ö se infiôu? cöse n’é stæto? —
Ed avanti che a Maddre a se rimette
260Da-ö spaximo causôu da sto resäto,
Ö tïa zù a rûbatton sensa permette
Che a l’arve a bocca e che a repigge fiato,
Quanto ö sa dä conversa intorno a-ö Loro,
Sbraggiando forte da sentîlo in coro.
265E Sorelle ch’ëan zà tûtte in sospetto,
Ve-a diggo bella, a questa so sciortïa,
Se son dïte che a fûga do Loretto,
Atro a n’ëa che ûnn-a balla, ûnn-a boxîa
Missa a mezo tra ö Paddre e a Sûperiôa
270Pe levâghe ö piaxei de sta demôa.
No ghe voeiva de ciù pe aççende a minn-a,
Piggiâ lampo a poviêa do mâ contento,
Che da-ö celebre exilio in ta cuxinn-a,
Sentivan tûtte, imbozzonise drento;
275— Ö Loro ö l’é scappôu, l’é scappôu ö Loro
Sätan sciù, lascian tûtto, e via d’in côro.
E poi tûtte in cuxinn-a. — E chi m’arresto,
Ö benigni lettoî, per ûn momento,
Che, pe poeì comme va, descrive ö resto,
280Rende e scene con gûsto e sentimento,
Ghe vorrieiva ûn scrittô con tanto de...
A parolla che ven seï cöse a l’é.
Ma me manca l’inzegno e ö gûsto estetico
Pe levâme a-ö sublime do lirismo,
285E descrive, st’amalgana d’ascetico,
De pascioin, d’ignoransa e d’isterismo
Misso in moto dä fotta, aççeiso, assiôu
Comme ûn sciammo de vespe aççimentôu.
Poeì figûavelo voï, mi no me sento,
290Che de dâvene conto a sommi cappi;
Va a Maddre in cella, e a se ghe særa dentro,
A conversa a s’asconde in mezo ai drappi,
E te resta lì ö Paddre in sta baracca,
Sensa saveì quanti ö se n’ha in ta stacca.
295Bonn-e päole, minaccie, esortamenti,
Dî che aveivan raxon, che aveivan torto,
Mette a mezo i ciù solidi argomenti,
L’ëa tûtto comme voeì toccâlo a ûn morto,
Lö sbraggiavan c’ûn diâo pe ogni cavello,
300«Sciä diä ben, sciä diä ben, ma fêua l’öxello.
Sciä ne-ö trêuve — Ma mi — Ma ninte affæto
— Ma se ö s’é perso cöse gh’ho da fâ? —
— Perso? son micce, se sciä ne l’ha dæto,
Aoa scià ö trêuve, e scià ne ö torne a dâ:
305Dove scià se l’ha ïnfiôu? — Ma in nisciun scito
— Scià ö tïe a mezo — Ma se... — Scià fasse fito —
Poeì figûave in che bella poxision
Ö povëo Paddre ö s’é dovûo trovâ
In presensa a sto pö de pretenscion
310De voei de cöse che ö no poeiva dâ,
Lê ö sbraggiava, meschin, che ö no l’aveiva,
Ma nisciûnn-a de Moneghe a-ö creddeiva.
Finalmente esaurïa l’ûltima squagia
De räxoîn, de minaccie, de paziensa,
315Misso a-e streite, arrembôu coe spalle a-a mûagia
Sensa mezzi de poeì fâ rezistensa,
Ö s’é dæto per vinto, ö se sperzuôu
Che vivo o morto ö ghe l’aviæ trovôu.
E comme a l’indoman d’ûnn-a tempesta,
320Ritorna ö bello e se riposa ö vento,
Ma pe ûn pesso veddei che ö mâ ö ve resta
Sempre mosso da ûn lungo ondulamento
Comme ö fosse ancon raozo, imbozzonôu
Da-ö venin de no ësise sfogôu;
325Coscì e Moneghe inverse e mugugnando
Han finïo pe lasciâse appaxentâ,
Mentre ö Paddre, ö l’andava borbottando:
Eccove lì cöse me tocca a fâ!
Trovû l’öxello mì pe appaxentâle...
330Bella cösa pe ûn Paddre spiritûale!