Poesie (Porta)/75 - Ma saal, sur rima in lella, che a dì pocch
 |
Questo testo è completo. | |
Carlo Porta - Poesie (XIX secolo)
75 - Ma saal, sur rima in lella, che a dì pocch
| ◄ | 74 - Coss'evela la manna che el Signor | 76 - RISPOSTA A ONA LETTERA IN VERS D'ON AMIS AMMALLAA CONT ON BUGNON | ► |
Ma saal, sur rima in lella, che a dì pocch
el meritta da vess casciaa in galera?
Asen fottuu, ch’el vaga strappà i sciocch
e minga a strappà i dent in sta manera.
Per cavamm on dent guast, tramm tutta in tocch5
la gengiva e on bon quart de restellera?
Ah sur Lella! ona porca de tarocch
pesc de lu no la gh’è propri davvera.
Soo che parland di strappadent in massa
se diseva ona voeulta che costor10
o che strappen el dent o la ganassa;
ma lu, sur Lella, per no avegh la flemma
de fà vuna di dò come fan lor,
el strappa la ganassa e i dent insemma.