 |
Questa pagina è stata trascritta e formattata, ma deve essere riletta. | |
| 884 | Gion Antoni Bühler |
[p. 23] Fratant che grev cargada la p(r)omèra,
Da lattas, pals e pozzas sustenida
Comparsa granda fa e bella çera.
Prest eis quieta vita uss svanida,
Sun faulçs, trivorçs, rastells in moviment;
Dal braç de bellas giuvnas se divida
Fenada aulta cun grand ardiment,
E s’alzan spert runellas e las runas
E las panuglias in zun curt moment.
A peina che sut tetg eis in cargunas
Il fein, agüzzan farclas las medunzas
E medan, fan cun ils manugls palunas,
E ligian mannas, stattan sco stigliunzas
Aunc tard la sera a glischar la teglia,
A far pivattas finas per filunzas.
Però suvent annetgamein se sveglia
Zun vehement il suffel da lontan;
Ün tun uss senta da sgrischur l’oreglia,
E vegnan cun las alas del orcan
Cametgs ardents e nüvels de tempesta
E de granella, quals horrur nus fan.
Tgei al human timid dels beins aunc resta?
O tot, tot ha l’Omnipotent salvau,
In bein manau ha ’l l’ura tant funesta!
Co ussa tot compara recreau
E nova vita s’allegrand respira,
Dal salvament eis tant felicitau!
Human timid, non crida e suspira!
Combatt e guerra nus la vita porta,
Et eis del bab etern la vera mira,
De nus provand manar a vita scorta,
Sco el er l’aria purifichescha
Cun il cametg, il qual dals nüvels sorta.
[p. 24] Ma semper inavant el circulescha,
Il temps legier, svolant e fugitiv,
E nel svolar del bön aunc operescha.
Da novamein cuverna spess resdiv
La prada, e las soleglivas spundas
Cun uvas uss s’infittan gia tempriv.
Il flum, qual va currind tras vals profundas,
El ha gia moderau siu pass rapid,
