Pagina:Basile - Lu cunto de li cunti, Vol.I.djvu/434

L’ORZA

---

Trattenemiento sesto de la Jornata seconna.

Lo re de Roccaspra vo pigliare la figlia pe mogliere; chella, pe astuzia de na vecchia, se cagna nforma d’orza, e fuje a le serve; e, venendo mmano de no prencepe, la vede nell’aspetto propio drinto no giardino, dove se faceva la testa¹, e se ne nammora; dapò varie succiesse, scoperta pe femmena, le deventa mogliere.

Tutto lo cunto, che disse Popa, fece ridere a schiattariello le femmene; ma, dove se trattaje de la malizia lloro, bastante a coffiare na vorpe, lloco avettero a crepare pe li fianche de lo riso! E, veramente, la femmena ha le malizie comm’a granatelle nfilate a ciento p’ogne capillo de la capo: la fraude l’è mamma, la buscia nutriccia, la losenga maestra, lo fignemiento conziglio, e lo nganno compagno, che bota e revota l’ommo comme le piace. Ma, tornanno ad Antonella, che s’era ngarzapelluta² pe parlare, la quale, stata no poco sopra de sè, comme se pigliasse mostra de li penziere, cossì dicette.

Disse buono chillo sapio, ca non se pò a commannamiento de fele obedire de zuccaro. Deve l’ommo commannare cose jaste de mesura, pe trovare obedienzia agghiustata de piso: dall’urdene, che non commeneno, nasceno le resistenze, che non s’agghiustano; comm’appunto

---

1. si pettinava.
2. Ringalluzzita, e qui, atteggiata, apparecchiata.