Pagina:Basile - Lu cunto de li cunti, Vol.I.djvu/263

jornata i. trattenemiento iii.

49

ma¹ a la via de lo vosco pe fare la venuta de lo cuorvo². E, comme fu miezo a na certa campagna, pe dove correva no shiummo, vervesianno e mormoreanno de la poca descrezzione de le petre, che le impedevano la strata, trovaje tre guagnune³, che se avevano fatto strappontino de l’erva, e capezzale de na preta selece; li quale, a la calantrella⁴ de lo sole, che le carfettejava⁵ a perpendicolo, dormevano comme a scannate. Peruonto, che vedde ste poverielle, ch’erano fatte na fontana d’acqua miezo na carcara⁶ de fuoco, avennone compassione, co la medesema accetta, che portava, tagliaje certe frasche de cercola⁷, e le fece na bella nfrascata. Fra chisto miezo, scetatose chille giovane, ch’erano figli de na fata, e, vedenno la cortesia e morosanza de Peruonto, le dezero na fatazione: che le venesse tutto chello, che sapesse

addemannare. Peruonto, avenno fatto sta cosa, pigliaje la strata verzo lo vosco, dove fece no sarcenone cossi spotestato, che nce voleva no straolo a strascinarelo. E, vedenno ch’era chiajeto scomputo⁸ a poterelo portare ncuollo, se le accravaccaje ncoppa, decenno: «O bene mio, se sta fascina me portasse camminanno a cavallo!» Ed ecco la fascina commenzaje a pigliare lo portante, comme a cavallo de Bisignano⁹; e, arrivato nante a lo palazzo de no re, fece rote e crovette da stordire. Le damicelle, che stevano a na fenestra, vedenno sta maraviglia, corzero a chiamare Vastolla, la figlia de lo re. La quale affacciatase a la fenestra, e puosto mente a

---

1. (ES) shiamma shiamma. Cfr. V, 9.
2. Int.: per non tornare o tornar tardi. Cfr. II, 10-
3. Fanciulli, giovanetti.
4. Sferza del sole.
5. Batteva.
6. Fornace per la calce.
7. Quercia.
8. Propr.: lite finita. Int.: cosa impossibile-
9. Comune della prov. e circond. di Cosenza; ab. 4460. Ancora nel secolo scorso erano celebrate le sue razze di cavalli. V. Giustiniani, o. c., Vol. II (Nap., 1797), ad nom.