Pagina:Decurtins - Rätoromanische chrestomathie, VIII.djvu/552: differenze tra le versioni

{{RigaIntestazione|542|Andrea Vital|}}

el Signur cussgl. dels stadis J. U. Könz, chi eira da quel temp eir student a Jena, ma fingià plü avanzà in seis stüdis. El pigliet a Pallioppi suot sia protecziun e füt seis leibbursch, fin ch’el, aviand fini seis stüdis, turnet in patria. Pallioppi intant vivaiva plüchöntsch retrat, adonte della buna compagnia e della multifarias occasiuns da ’s laschar distrar dels stüdis. Diligiaint ed intelligiaint sco ch’el eira, al bastettan ses semesters, ch’el passentet per part a Jena, per part a Berlin, per al furnir nella giurisprudenza cognoschentschas teoreticas solidas e profuondas, impostüt nel dret roman. Quel eira in Germania quella vouta ed ais stat fin avant pacs ans la base fundamentala del stüdi per ils giurists ed ha excercità sül giuven Pallioppi üna granda influenza. Seis sen pronunzià, sco cha nus vezzeran plü tard in sias lavuors filologicas, per üna sistemaziun clera ed üna logica severa ha el raccolt sainza dubi dal stüdi del dret roman. Ch’el s’haja occupà con stüdis filologics fingià all’università non ais, a que ch’eu podet indreschir, probabel. Ma ch’el cognoschaiva il romantsch fingià quella vouta blerun plü bain, co que chi ais hozindi il cas pro noss students a lur retuorn dell’università, e ch’el disponiva d’üna verva poetica insolita: quaist ans muossa üna poesia del 1843, alla qualla revgneran plü tard.

Installà sco advocat in seis comün patern, fet el que, cha la granda part fan e tuots stovessan far: el as tscherchet üna compagna per sia vita; o anzi, per dir il vaira, el s’accompagnet con quella compagna, ch’el avaiva schelt fingià avant co ir all’università. Returnà nempe dal ginnasi da Coira a Celerina, sco cha nus avain vis, nel Avrigl 1841, restet el là fin d’utuon e non profitet da seis temp be per far poesias ed admirar las fluors della cuttüra e las stailas del tschel. Anzi el fet our da sia vita svessa üna poesia, s’acquistand l’amur d’üna dellas plü bellas fluors della vschinancha, chi avaiva collas stailas glüschaintas da seis ögls tut possess da seis cour. Scha nos student con seis vainchün ans volaiva observar la regla fich recommandabla, cha la duonna haja dad esser var tschinch ans plü giuvna co l’hom, stovet el tscherchar sia spusa tanter quellas mattas, chi eiran apaina intradas nella società della giuventüm. Que eira apunto il cas con quella fluor con ögls glüschaints, dalla quala füt il discuors güst in quaist momaint: Giunfra Ursina Mengia Vicedomini, la giunfra spusa, eira nada als 21 Dezember 1825, sco figlia da Gian Battista Vicedomini e da Susanna nata Pool. Ella appartgnaiva da vart bap ad üna famiglia immigrada dalla Vuclina, chi avaiva pers seis vaschinadi primitiv, sainza as acquistar ün oter nella nouva patria: ell’eira heimatlos. Da vart mamma appartgnaiva ella ad üna veglia schlatta da Celerina, e per que chi reguarda las qualitats chasarinas, tret ella davo