|
PIERO DE GHETTO (PIERIN DE RÒCHE DE LISEO)
Na vita intiera
D’auton del 1945 èi scominzià a dì a la scola alberghiera de Cortina.
Davante al porteà, da chel’autra parte de la strada, l era al canpo sportivo e nosautre scolare deane a duià al balon. Ió duiao in porta e me penso che n’ota an riedo, an tin pi vecio de me, al stasea a me vardà e al me disea ce che aeo da fèi. Daspò èi saù che l era al portier de la scuadra del Cortina. Al se ciamaa Ivo e chela l é stà la prima ota che l èi vedù.
Zinche ane daspò èi scominzià a laurà a Cortina e can che ienia al nieve deo a sià col mè paron su in Faloria cuasi dute i dis. Tanta otes vedeo Ivo che siaa e can che se incontreane al me saludaa e l disea: Ciao cadorin!
Dal 1950 al 1954 d’inverno, cuasi duta la domenies deane a fèi gares de sie par duto al Cadore: Tai, Pozales, Valesela, Vigo, Laio, Auronze, San Vido, Borcia. An puoce da San Vido, cuatro o zinche da Borcia e tré o cuatro da Cortina; se ciateane dute da bonora su l trenin Cortina-Calalzo.
Ivo l era al pi brao e l vinzea duta la gares. N’ota sul Col Agudo apena partì, inveze che pasà su na pasarela che i aea fato l é dù dó par la sponda e l é tornà su da chel autro vès. La pista l era longa e iazada: Ivo l a vinto la gara.
I premie che i me dasea l era senpre chi e Ivo fasea racolta de ciameses e de ociai da sol! Ió aeo an per de sie Dynamic longhe doi metre e vinte e Ivo al me menaa in giro e l disea: Scurta i sie e slonga la ianbes se te gos vinze …
Ivo al fasea al spazacamin. D’istade al fasea al maestro de tenis e d’inverno al maestro de sie. Tanto fasea de l vede par strada vestì da bianco can che l dea a duià a tenis o duto sforsignà, col brason e la cordes su schena can che l dea a netà i camin. O in divisa da maestro de sie. Chel che se vedea prima de duto l era i sò guoie zeleste. An color che nesun crede.
Daspò son dù in Germania e se aon perdù de vista. In ciou de tanto al vedeo e al me saludaa così: Sosto senpre fora par chi todesce...?
Del 1974 e 1975 ió i daseo na man a la scola de sie de Borcia. Nieve no ghen’era e me tociaa dì a Misurina. Ió no èi mai fato al maestro de sie, ma parcé che dute chi riede me cognosese me aeo betù su la divisa da maestro.
Ivo al m’a vedù e da alora can che l me vedea al me saludaa così: Ciao colega!
L ultima ota che l èi vedù l era a Faloria che l fasea scola de sie. I èi dito: Te aspieto dó ize rifuio che don a se bee argo. Me despiase, no èi tenpo, l a dito Ivo, sarà par an’autra ota.
A sto mondo no se ciata mai al tenpo par fèi chel che conta.
An di de marze de carche an pasà un dei mè fioi che fas al maestro de sie al me a telefonà in Germania e al m’a dito: Incuoi a Pocol an maestro de sie de Cortina al se a destirà davante i mè pes; ei vedù a vista che l era na roba seria, èi ciamà la Croce Bianca e èi proà a fei el posibile par i adià.
I l a portà al Codivila, ma no l é stà nia da fèi.No son bon de me la lasà pasà.
Al se ciamaa Ivo Lacedelli de Còbe: al cognoseesto?
(Borcia)
PIERO DE GHETTO “DE ROCHE DE LISEO”
| 