 |
Questa pagina è stata trascritta e formattata, ma deve essere riletta. | |
| - 104 - |
- La forza del mal abet.
- SONETT.
Giura l’occa pitocca! sont mò stuff
De sto mestee besasc de fà sonitt.
No vuj saveghen pù, già l’hoo straditt,
A cost de andà col gerla a fà su ruff.
Sèma fà el caragnon, sèma fà el buff
Per scœud de vun, de l’olter i petitt,
E s’cervellass, e spend di bej sesitt,
Per vess anch tavanaa, per restà muff.
Ah! questa pœù la me sgarbezza nò,
E vuj romp la ghitarra, e vuj manda
La musa del Carrobbi a Gambolò.
Inscì diseva intra de mi pocch fa;
Ma el mal abet, ohimè! cossa nol pò?
E on sonett torni in quella a schiccherà.
