 |
Questa pagina è stata trascritta, formattata e riletta. | |
| I RUSTEGHI | 53 |
Lucietta. La sarà qualche antigaggiaa. (piano, brontolando)
Margarita. Cossa diseu? (allacciando la collana)
Lucietta. Gnente.
Margarita. Sempre brontolè. (conìe sopra)
Lucietta. La varda: una perla rotta. (si trova una perla rotta in seno)
Margarita. E cussì? cossa importa? Slarghele un pochettinb.
Lucietta. Xele tutte rotte?
Margarita. Debotto me faressi dir...
Lucietta. Quanti anni gh’ala sta collana?
Margarita. Voleu zogarc, che ve la cavo e la porto via?
Lucietta. De diana! sempre la cria.
Margarita. Mo se no ve contente mai.
Lucietta. Staghio ben?
Margarita. Stè benissimo.
Lucietta. Me fala ben al viso?
Margarita. Pulito, ve digo, pulito. (La gh’ha un’ambizion maledettonazzad).
Lucietta. (No ghe credo gnente, me vôi vardare). (tira fuori di tasca uno specchietto.)
Margarita. El specchio gh’avè in scarsellaf?
Lucietta. Oh, el xe un strazzetog.
Margarita. Se vostro sior padre ve lo vede!
Lucietta. Via, no la ghe lo staga a dir.
Margarita. Velo qua, vede, che el vien.
Lucietta. Sia malignazo! No m’ho gnanca podesto veder ben. (mette via lo specchio)
SCENA III.
Lunardo e dette.
Lunardo. Coss’è, siora? andeu al festin? (a Margarita)
Margarita. Tolè. Velo qua. Me vesto una volta a l’anno, e el brontola. Aveu paura, figurarse, che ve manda in malora?
