Pagina:Goldoni - Opere complete, Venezia 1909, VI.djvu/473


I PETTEGOLEZZI DELLE DONNE 461

Checca. Oimè! Cossa diseu? M’avè dà una feria al cuor.

Beppo. Se el vostro cuor xe ferìo, el mio xe debotto morto.

Checca. Mo via, cossa xe sta?

Beppo. Checca, me voleu veramente ben?

Checca. De diana! Se ve voggio ben, me disè? No ghe vedo per altri occhi che per i vostri.

Beppo. Donca, se me volè ben, diseme la verità.

Checca. No ve dirave una busia per tutto l’oro del mondo.

Beppo. Diseme, Checca: seu veramente fia de paron Toni?

Checca. Cossa diavolo diseu? Seu matto? De chi voleu che sia fia?

Beppo. Via, no andè in collera. Respondème a mi. Dove seu nata?

Checca. A Corfù son nassua. Sior pare, come che savè, l’ha sempre navegà, e delle volte el menava con lu mia mare; la giera gràvia, e la m’ha fatto a Corfù.

Beppo. Checca, ho paura che no la sia cussì.

Checca. Mo per cossa? Ve xe sta messo qualche pulese1 in testa?

Beppo. I m’ha dito liberamente, che no se fia de paron Toni.

Checca. Ma de chi diseli che son fia?

Beppo. Oh Dio! No gh’ho cuor de dirvelo.

Checca. Disemelo, se me volè ben.

Beppo. I disc... i dise, che no sè legittima.

Checca. Oh poveretta mi! (piange)

Beppo. Via, fia, no pianzè. Vegniremo in chiaro della verità.

Checca. Caro Beppo, avereu cuor de lassarme?

Beppo. Oh Dio! Lassème star. No so in che mondo che sia.

Checca. Ma chi v’ha dito ste cosse? Vederè che no sarà vero gnente.

Beppo. Alla persona che me l’ha dito, bisogna che ghe creda.

Checca. Caro vu, diseme chi ve l’ha dito.

Beppo. No, no ve lo posso dir.

Checca. Se no mel disè, xe segno che no me volè ben.

Beppo. Ve voggio ben; ma no ve lo posso dir.

Checca. Eh, mi so chi ve l’averà dito.

Beppo. Via mo, chi?

  1. Pulce.