 |
Questa pagina è stata trascritta, formattata e riletta. | |
| 460 | ATTO SECONDO |
Toffolo. Eh, ghe ne giera dei altri, che ghe voleva ben.
Checca. Diseme mo, chi?
Toffolo. Mi giera uno de quelli.
Checca. Vu?
Toffolo. Siora sì, mi xe da putello in suso che servo paron Toni, e in tutti i so viazzi mi son sta sempre co elo, e de mi el se fida più de nissun, e qualche volta el m’ha dà qualche poco de speranza. Basta, ghe vol pazienza.
Checca. Oh, vede ben, un paron de tartana volè che daga una so fia a un mariner.
Toffolo. Cossa xelo un mariner? El xe uno che da un momento all’altro poi deventar paron; e pò, cara siora Checca, mi so delle belle cosse. Nissun sa i secreti de paron Toni, altro che mi. Mi so come l’ha fatto i bezzi: e de vu so quel che no credè che sappia.
Checca. De mi? cossa saveu?
Toffolo. Vien Beppo, vago dalla sartora.
Checca. Oe, parleremo con comodo; vôi che me disè tutto.
Toffolo. Sì, sì, ve conterò. (No ghe dirò gnente. Squasi più ho scoverto quel che ho sempre tegnù coverto). (parte)
Checca. Sto putto m’ha messo in t’una gran curiosità.
SCENA II.
Beppo e Checchina.
Checca. Beppo, tanto sè sta? Cossa volevela siora Eleonora?
Beppo. Ah! (sospira)
Checca. Cossa gh’aveu, che sospirè?
Beppo. Dove xe paron Toni?
Checca. Chi? Vostro missiera?
Beppo. Nol xe gnancora mio missier.
Checca. Se nol xe, el sarà.
Beppo. Cara Checca, ho paura de no.
- ↑ Suocero.
