Lege Provinziela de 30 setëmber 2005, Nr. 7 Normes tla materia dla nuzeda d'eghes publiches y de mplanc eletrics
 |
Questo testo è incompleto. | |
LEGE PROVINZIELA 30 de setëmber 2005, Nr. 7 1)
Normes tla materia dla nuzeda d’eghes publiches y de mplanc eletrics
2005
1. (Ciamp d’aplicazion)
(1) Chësta lege regulea la nuzeda dl’eghes publiches y di mplanc eletrics da pert dla provinzia autonoma de Bulsan aldò dl plann generel per la nuzeda dl’eghes publiches nunzià tl articul 14 dl decret dl Presidënt dla Republica dl 31 d’agost 1972, nr. 670.
2. (Cumpetënzes) (1) L assessëur provinziel cumpetënt tla materia dl’eghes publiches y dl’energia dezid n cont dla dumandes de recunescimënt y de cunzescion de derivazions d’ega grandes y pitles, ora de chëles a fin idroeletrich, sun la relasceda dl nulla osta udù danora dal articul 20 dl decret dl rë dl 11 de dezëmber 1933, nr. 1775, y sun la relasceda dla lizënza per se nuzé d’eghes.
3. (Pruzedura d’ejaminazion)
(1) La dumandes per giaté la cunzescions o per fé variantes a chëstes ie da prejenté cun la documentazion scrita dant dal diretëur dla Repartizion provinziela per l’eghes publiches y l’energia al ufize cumpetënt dla medema Repartizion. Les vën lascedes pro cun urdinanza dl ufize cumpetënt dla Repartizion provinziela per l’eghes y l’energia a na pruzedura d’ejaminazion. La urdinanza vën publicheda per chindesc dis sun la tofla dl chemun o di chemuns, ulache la pieda, l mplant y, eventualmënter, la restituzion dla derivazion d’ega damandeda ie udui danora. Ala urganisazion di paures plu reprejentativa a livel local ti vëniel mandà na copia dla urdinanza. Tla urdinanza iel stabilì l di, l’ëura y l luech d’ancunteda dla vijita dla lueges y l ie dat sëura l lim de tëmp te chël che l possa unì prejentà usservazions y obiezions scrites contra la derivazion damandeda o contra la derivazions damandedes. Chësc lim de tëmp va dal scumenciamënt dla publicazion nchin n l di dan la vijita dla lueges stabilides, che messerà unì fata tl tëmp de 20 dis dala fin dla publicazion. L ufize cumpetënt dla Repartizion provinziela per l’eghes publiches y l’energia dejëuj la vijita dla lueges. A chësta vijita muessa tò pert chi che à prejentà la dumanda o zachei che ie unì numinà te si reprejentanza y che ebe l’autorisazion de l fé, oradechël possa tò pert ala vijita duc chëi che ie nteressei. L ufize cumpetënt dla Repartizion provinziela per l’eghes publiches y l’energia possa renunzië a dé ora y publiché la urdinanza nunzieda sce l se trata de dumandes per lizënzes de nuzeda d’eghes nchin a 5 litri al secunt o tl cajo de giavedes temporeres d’ega de sotfonz aldò dl articul 19 dla lege provinziela dl 18 de juni 2002, nr. 8, y mudazions suzessives.
(2) La dumandes concurëntes possa unì prejentedes tl tëmp de 30 dis dala data dla vijita dla lueges data sëura tla urdinanza y vën publichedes aldò dla despusizions nunziedes pra l coma 1. L ne vën nia lascià pro mo d’autra dumandes concurëntes.
(3) Pra la cunzescions che reverda dantaldut l’eghes de nuzeda te cësa, da bever y contra l meldefuech vëniel, tl cajo de plu concurënc, dat la preferënza ala dumanda dl gestëur dl servisc dl’ega da bever.
(4) La dumandes de derivazion per l refurnimënt d’ega da bever publich, che ne ie nia cumpatibles cun la dumandes che fova unides fates dant y che vën prejentedes do l lim de tëmp nunzià pra l coma 2, vën lascedes pro ezeziunalmënter cun na urdinanza dl diretëur dla Repartizion provinziela per l’eghes publiches y l’energia. La dumandes vën detlaredes concurëntes cun l’autra dumandes a cundizion che l sibe rejons de prëscia de nteres publich y che l vënie desmustrà che l ne ie degun’autra puscibltà de refurnimënt a cosć pruporziunalmënter azetabli y zënza deficulteies tecniches spezifiches. (5) L assessëur provinziel cumpetënt per l’eghes publiches y l’energia detlarea nia amiscibles y refudea la dumandes che ne ie nia puscibles da realisé o che ie cuntreres a n bon manejamënt dl’eghes o a d’autri nteresc generei.
(6) Oradechël ie nce la dumandes de cunzescion o si variantes refudedes y archivedes, sce la Jonta provinziela à purtà a esprescion na minonga negativa sun l recurs contra l bënsté VFA aldò dla lege provinziela dl 24 de lugio 1998, nr. 7, y mudazions suzessives.
(7) Tl cajo de dumandes d’estrazion d’eghes de sotfonz ne iel nia debujën dla relazion d’ejaminazion.
(8) I articuli 7 y 10 dl decret dl rë dl 11 de dezëmber 1933, nr. 1775, y mudazions suzessives, ne vën nia aplichei.
4. Cunzescion
(1) Sce l ne vën nia fat n cudejel dla ublianzes, vën la despusizions a cëria dl cunzesciuner scrites tl decret de cunzescion.
(2) Tl decret de cunzescion iel oradechël udù danora l bujën, che pudëssa eventualmënter se purté pro, de dejëujer n colaud di lëures finei che vën autorisà dal Diretëur dla Repartizion provinziela per l’eghes y l’energia.
(3) L decret de cunzescion vën publicà te pertes tl Buletin Ufiziel dla Region.
(4) L’aministrazion che dà la cunzescion à la puscibltà, zënza la ublianza de ndenisazion, de mudé o junté prescrizions tecniches, sce chësc ie debujën per l nteres dla defendura dl terac, dl ambient, dla natura y dla cuntreda o, a uni moda, per l nteres publich.
5. (Recunescimënc)
(1) La vedla rejons de derivazions d’eghes mo nia recunesciudes vën recunesciudes de dërt, sce la cundizions tlo cumpededes su ie dates:
- a) l’ega ie unida deriveda zënza nteruzion ti ultimi trëi ani;
- b) i fins uriginei dla nuzeda dl’ega ie i medemi;
- c) i mplanc ie te na cundizion tecnicamënter sciche l toca o vën adatei a chësta cundizion tl tëmp
de n ann;
- d) tl cajo de na nuzeda per irigazion muessa l mplant vester autonom y l ne daussa vester
degun’auter refurnimënt d’ega che sibe assé per la medema sperses, p.e. n refurnimënt tres cunsorc o nteressënzes;
- e) l mplant atuel daussa mé se deferenzië te na maniera nia senificanta da coche i mplanc fova a
pië via; la tramudeda da irigazion a fonz a irigazion a plueia vën lasceda pro.
(2) Per cunstaté che la cundizions cumpededes su pra l coma 1 sibe bën dates, njinia l ufize provinziel cumpetënt per la nuzeda dl’eghes n formuler tecnich de dac, che ie da scrì ora dai nuzënc y cun chël che i detlarea che la cundizions aldò dl coma 1 ie ejistëntes. Sce duta la cundizions ie dates, comunichea l ufize provinziel cumpetënt l recunescimënt dla nuzeda dl’ega dajan sëura la carateristiches dla derivazion y la soma dla chëuta che ie da paië.
(3) La cuantità d’ega che possa unì deriveda ie adegueda ai criteres dl plann generel per la nuzeda dl’eghes publiches. La dureda de chësta nuzedes ie de 30 ani dal recunescimënt.
(4) L ufize provinziel cumpetënt per la nuzeda dl’eghes fej cuntroi sun almanco l sies percënt dla detlarazions prejentedes.
6. Pruibizion de nuzeda
(1) Restan mpe cie che ie udù danora dal articul 10 y dal articul 23-bis dla lege provinziela dl 18 de juni 2002, nr. 8 iel pruibì derivé o nuzé eghes publiches zënza cunzescion o d’autri tituli de dërt.
(2) Sce la pruibizion nunzieda pra l coma 1 ne vën nia respeteda, cumanda l diretëur dl ufize cumpetënt dla Repartizion provinziela per l’eghes publiches y l’energia de zeder debota cun la derivazion y l dà la straufonghes aministratives ududes danora.
7. (Cauzion)
(1) Coche garanzia che la ublianzes liedes ala cunzescion vënie respetedes possa l ufize cumpetënt dla Repartizion provinziela per l’eghes publiches y l’energia se damandé che la cunzescion o l’autorisazion vënie sometudes al paiamënt de na cauzion de na soma che depënd dala mesura di mplanc.
(2) L diretëur dla Repartizion provinziela per l’eghes publiches y l’energia se cruzia che la cauzion vënie delideda do che l ie unì cunstatà che la ublianzes liedes ala cunzescion ie unides tenides ite avisa.
8. (Variantes)
(1) Chi che nuza eghes publiches y uel dejëujer mudazions pra na derivazion bele recunesciuda o data n cunzescion, muessa prejenté na dumanda al ufize cumpetënt dla Repartizion provinziela per l’eghes publiches y l’energia.
(2) Coche variantes vën cunscidredes chëla mudazions che reverda l avanamënt, ënghe sce mé te fases singules dl tëmp de nuzeda, dla cuantità dl’ega cunzeduda o recunesciuda, l slungiamënt dl tëmp de nuzeda, l mudamënt dla nuzeda o l avanamënt dla putënzia numinela. Ala variantes vëniel aplicà duta la despusizions ududes danora per la cunzescions nueves.
(3) Uni varianta fata pra la mascins per la produzion dl’energia eletrica muessa dant unì comunicheda al ufize cumpetënt dla Repartizion provinziela per l’eghes publiches y l’energia.
(4) Uni dumanda de varianta a dumandes de derivazion te pruzedura d’ejaminazion vën te uni cajo cunscidreda coche na dumanda che remplazea chëla da dant.
(5) Duta la variantes revardëntes la recostruzion o miuramënc de mplanc d’abineda, de pieda, de aduzion y restituzion, y l slargiamënt dla spersa de irigazion y dla rë d’ega da bever, vën autorisei dal ufize cumpetënt dla Repartizion provinziela per l’eghes publiches y l’energia.
9. (Lizënza de nuzeda dl’ega)
(1) La dumanda de lizënza per se nuzé dl’ega aldò dl articul 56 dl decret dl rë dl 11 de dezëmber 1933, nr. 1775, y mudazions suzessives, ie da prejenté al ufize cumpetënt dla Repartizion provinziela per l’eghes publiches y l’energia. La dumanda muessa vester acumpanieda da dessënies y da na relazion, te chëla che l vën descrì i lëures y desmustrà che i nteresc publics y i dërc de terc vën respetei.
(2) La chëuta dl’ega ududa danora muessa unì paieda danora. L ne ie deguna ublianza de cauzion.
(3) I prelevamënc d’ega nchin a 5000 litri al di per furedes pra cantieres de nteres publich ie delidei dala chëuta y possa unì fac liediamënter do che l ti ie unì comunicà al ufize cumpetënt dla Repartizion provinziela per l’eghes publiches y l’energia. L daussa mé unì derivà na cuantità d’ega nchin al 10 percënt dla purteda d’ega che ie da garat y chësc per na dureda de al plu 30 dis ndolauter. La rejons ejistëntes muessa unì respetedes.
10. (Funtanes)
(1) Dala pitla funtanes possel unì nuzà y tëut liediamënter ega per n’adurvanza te cësa y da bever nchin a na cuantità de 0,40 litri al secunt. La rejons ejistëntes muessa unì mantenides.
(2) Nuzedes nueves te n raion de defendura d’ega da bever muessa unì autorisedes dal ufize cumpetënt dla Repartizion provinziela per l’eghes publiches y l’energia.
11. (Slungiamënt di tëmps)
(1) L diretëur dla Repartizion provinziela per l’eghes publiches y l’energia slongia i lims de tëmp per i lëures de costruzion y per l’atuazion dla derivazions d’ega. (2) L assessëur provinziel de cumpetënza per l’eghes publiches y l’energia tòl i pruvedimënc n cont dla destumënza dla cunzescions o di recunescimënc y dla cuntestazions y ghiranzes respetives.
12. (Stënta d’ega) (1) Per afrunté situazions de stënta d’ega, vëniel metù su pra la Repartizion provinziela per l’eghes publiches y l’energia na cumiscion metuda adum da:
- a) l diretëur dla Repartizion provinziela per l’eghes publiches y l’energia coche presidënt;
- b) l diretëur dl ufize provinziel per la nuzeda dl’eghes;
- c) n reprejentant dl’Agenzia provinziela per l ambient;
- d) n diretëur dla Repartizion provinziela per i bosc;
- e) n diretëur d’ufize dla Repartizion provinziela per l’agricultura;
- f) n reprejentant di chemuns dl raion idrografich tucà dala situazion de stënta d’ega.
(2) Tl cajo de stënta d’ega ti fej la cumiscion na pruposta al Presidënt dla Provinzia n cont de ciuni di raions idrografics che dëssa unì detlarei te na situazion de stënta.
(3) Ntan la situazion de stënta d’ega tòl la cumiscion i pruvedimënc tlo dessot cumpedei su, per garantì, tl orden nsci dat dant, l refurnimënt publich d’ega da bever, l refurnimënt privat d’ega da bever y la nuzeda per la irigazion:
- a) reduzion dla cuantiteies d’ega restantes;
- b) reduzion o fermeda dla derivazions d’ega;
- c) prescrizion de turnus de nuzeda;
- d) trasferimënt de cuantiteies d’ega y nuzeda d’ega acumuleda nce per d’autri fins, ënghe da
resservares dedora dl raion idrografich tucà;
- e) nuzeda de funtanes d’ega nueves.
(4) I pruvedimënc aldò dl coma 3 possa vester sibe de natura gestiunela che de costruzion. I pruvedimënc de natura gestiunela vën realisei da pert dl cunzesciuner dl’ega, la mesures de costruzion vën fates dal nuzënt de chësta mesures. Canche la situazion de stënta ie passeda muessa la situazion inò unì repurteda tla cundizions da dant, ora che sce l vën relascià na cunzescion o n’autorisazion regulera sun dumanda dl nteressà.
(5) Do la fin dla stënta d’ega nfurmea l presidënt dla cumiscion l Presidënt dla Provinzia che revuchea la situazion de stënta.
13. (Eghes minereles)
(1) L’eghes minereles tl raion dla provinzia de Bulsan ie pert dl patrimone nia despunibl dla Provinzia autonoma de Bulsan.
(2) La cunzescion dl’eghes minereles, che daussa mé unì derivedes da eghes de sotfonz y de sëuraspersa, per chëles che l vën realisà raions de defendura, vën data aldò dla despusizions valëivles per l’eghes publiches, do che l carater minerel de chëst’eghes ie unì recunesciù da pert dl’Agenzia provinziela per l ambient y do la iscrizion tla lista relativa dl’eghes minereles tenida dal’aministrazion provinziela.
(3) Ai fins dl ciariamënt te bozes o dla nuzeda termala o terapeutica dl’eghes minereles vën l recunescimënt dl carater minerel dl’eghes dejëut dal’Agenzia provinziela per l ambient deberieda cun l’Azienda sanitera de Bulsan.
(4) La despusizion aldò dl coma 3 ne vën nia aplicheda al’eghes adurvedes per tratamënc idrics nia terapeutics ti albiercs y te strutures semientes tipiches tla tradizion locala.
(5) L decret de cunzescion spezifichea la cuantità d’ega derivabla y determinea la chëuta che ie da paië uni ann sun la basa dla cuantiteies mesanes cunzedudes al ann. La soma dla chëuta da paië uni ann ie determineda nsci: a) per l’eghes metudes te bozes 594,00 euro per liter al secunt cun na chëuta minima de 5.940,00 al ann; b) per l’eghes adurvedes coche eghes termeles o per d’autra adurvanzes terapeutiches 297,00 euro per liter al secunt, cun na chëuta minima de 2.970,00 euro al ann; c) per l’eghes destinedes a n’autra adurvanza 178,00 euro per liter al secunt, cun na chëuta minima de 178,00 euro al ann. (6) La chëuta al ann y minima per la nuzedes singules d’ega minerela possa unì adateda uni doi ani dala Jonta provinziela sun la basa dla variazions di cosć dla vita aldò di indicatëures dl ISTAT.
(7) La chëuta per la cunzescions bele dates ora vën adateda ala despusizions de chësta lege, tenian cont dla cuantiteies mesanes nuzedes ti trëi ani passei.
(8) La despusizions per la cunzescion di cuntribuc udui danora dala lege provinziela dl 8 de nuvëmber 1974, nr. 18, y mudazions suzessives, ne vën nia aplichedes per l’eghes minereles nunziedes te chësc articul.
(9) I raions de defendura che ie debujën per la funtanes d’ega minerela nia dates ca n cunzescion vën istituìi dal ufize cumpetënt dla Repartizion provinziela per l’eghes publiches y l’energia y aministrei dala Repartizion provinziela per i bosc.
14. (Delidamënt dal paiamënt)
(1) Chi che damanda la cunzescion de derivazion d’ega, si renuveda, la variantes a chësta o si trasferimënt, ie delidei dal paiamënt dla spëises dl’ejaminazion y dl colaud.
15. (Linies eletriches)
(1) La linies eletriches cun na tenscion de nia plu che 1000 Volt y chëles per la luminaria publica sciche nce i mplanc che toca leprò ne à nia debujën de unì autorisei dala Repartizion provinziela per l’eghes publiches y l’energia. La ublianza de bënstëies che ie eventualmënter debujën resta te uni cajo mpe.
(2) Chi che fej dumanda d’autorisazion per la costruzion de linies eletriches aldò di articuli 107 e suzessives dl decret dl rë dl 11 de dezëmber 1933, nr. 1775, ie delidei dal paiamënt dla spëises dl’ejaminazion.
(3) L ufize cumpetënt dla Repartizion provinziela per l’eghes publiches y l’energia publichea la dumandes d’autorisazion per la costruzion de linies eletriches per 30 dis alalongia tacan ora la nutizia sun la tofles di chemuns nteressei. Tl tëmp nunzià possa duta la persones nteressedes prejenté usservazions y obiezions pra l ufize cumpetënt.
(4) La publicazion dl avis tl Buletin Ufiziel dla Region aldò dl articul 111 dl decret dl rë dl 11 de dezëmber 1933, nr. 1775 ne vën nia fata.
16. (Renuvamënt dla cunzescions)
(1) La cunzescions valëivles n la data dla jita n forza de chësta lege, ora che la cunzescions per la produzion de energia eletrica, vën renuvedes, canche les destoma, per n tëmp de 30 ani, a cundizion che l sibe dat chësta premisses: l ne ie degun nteres publich plu aut, l fin dla nuzeda y la derivazion va inant y ie cumpatibli cun n bon manejamënt dl’eghes, i mplanc curespuend al livel dla tecnica y, tl cajo de cundotes d’ega da bever, ie l chemun a una che l eserzize vënie mënà inant aldò dl articul 13 dla lege provinziela dl 18 de juni 2002, nr. 8.
(2) Sce, nce do de plu nvic da pert dl ufize cumpetënt dla Repartizion provinziela per l’eghes publiches y l’energia, ëssa la cundizions nunziedes tl coma 1 da mancë, ie la cunzescion destumeda y l tituler dla cunzescion muessa tò demez i mplanc y repurté la luegia tla situazion da dant. Tl cajo de cundotes d’ega da bever vëniel aplicà l articul 13, coma 1 dla lege provinziela dl 18 de juni 2002, nr. 8, y la cunzescion per l’ega relativa ti vën data al chemun do che chësc à presentà la dumanda relativa.
(3) Canche la cunzescion destoma possa l ufize cumpetënt dla Repartizion provinziela per l’eghes publiches y l’energia dé dant prescrizions revardëntes la defendura dl ambient, i njins tecnics y l eserzize di mplanc.
(4) La despusizions nunziedes ti comes da dant vën nce aplichedes ai dërc antics de derivazion d’ega recunesciui.
17. (Norma transitora revardënta zitli) (1) L’autorisazions ala costruzion y ala nuzeda de zitli dates ora dan l 4 de mei 1999, y la comunicazions n cont de zitli prejentedes dan l 5 de dezëmber vën tramudedes te cunzescions.
(2) La dureda ie de 30 ani dala data dl decret d’autorisazion o dala data dla comunicazion. L renuvamënt vën fat aldò dla normes ududes danora per la cunzescions.
18. (Norma transitora revardënta l’ega contra l meldefuech)
(1) La comunicazions n cont dla derivazions d’ega per spesé i resservares d’ega de nuzeda contra l meldefuech prejentedes dala Repartizion provinziela per i bosc nchin ai 31 de dezëmber 2000 vën tramudedes te cunzescions cun la dureda nchin ai 31 de dezëmber dl 2029. La despusizions valëivles tla materia dla gestion dla ressurses idriches muessa unì respetedes. 19. 2)
20. (Abrogazions)
(1) L vën abrogà:
- a) la lege provinziela dl 4 setëmber 1976, nr. 40, y mudazions suzessives, ora che l articul 16-bis;
- b) la lege provinziela dl 23 d’agost 1978, nr. 49, y mudazions suzessives.
21. (Jita n forza)
(1) Chësta lege va n forza l di do de si publicazion tl Buletin Ufiziel dla Region. Chësta lege unirà publicheda tl Buletin Ufiziel dla Region. Uni un a chël che ti spieta, à da la respeté sciche lege provinziela y da la fé respeté.
- 1) Publicheda tl B.U. dl 11 d’utober 2005, nr. 41.
- 2) Ntegrea l articul 1, coma 3, dla L.P. dl 11 d’auril 2005, nr. 1.