Canzone e Ariette nove/Ariette nove/Doje «purticese»

Doje «purticese»

../Virgiliana ../Siente, si vide... IncludiIntestazione 7 novembre 2013 100% Letteratura

Ariette nove - Virgiliana Ariette nove - Siente, si vide...
[p. 75 modifica]

Doie “purticese„

Uno t’ha ditto...

I.


Uno t’ha ditto: «E che bella figliola!
     «Che bello purtamento signurile!
     «Oi purticesa, e ve ne jate sola,
     «cu st’uocchie doce e stu viso gentile?..».

               E tu nun ll’ ’è risposto.
                    E nun te si’ ddignata
                    nemmeno d’ ’o guardà...
                         Luntanamente
               luceva - aperta - ’a cchiesa
                    ’e San Ciro putente...
                         Povera purticesa...
               Addo’ facette voto ’e te spusà.

[p. 76 modifica]


E, annascosto adderete a na culonna,
     llà t’ aggio vista n’ terra addenucchià:
     llà t’ aggio vista n’ faccia a na Madonna
     st’ uocchie, lucente ’e lacreme, aizà...
               E tu, forse, mm’ ’è visto.
                    Ma nun te si’ ddignata
                    nemmeno ’e t’ avutà.
                         Po’ — lentamente —
               si’ asciuta ’a dint’ ’a cchiesa
                    ’e San Ciro putente...
                    Povera purticesa!
               Addo’ te fece ’o voto ’e te spusà...



[p. 77 modifica]

Tramonto a Puortece

II.


          D’ ’a cchiesia ’e san Pascale
               ’a campana, ca sona
               — cu nu suono argentino —
                         a mmatutino,
          a poppa e a prora
               sceta chi dorme ancora
               ncopp’ ’o vuzzo e ’o vasciello
                         d’ ’o Granatiello.
E, tutto nzieme, se sente na voce:
     «Ccà sta Teresenella ’a purticesa!
     Ddoje pe nu rano ’e purtualle doce!
     E so’ meglio d’ ’e fravule ’e cerase!...»

[p. 78 modifica]


          ’A campana d’ ’a cchiesa
               mo sona — cu nu suono
               ca fa malincunia —
                         l’avummaria.
          Sciso è int’a ll’onne
               ’o sole — e s’annasconne:
               ’a vela ’e nu vasciello
               pare ca luce, ncopp’ ’o cielo d’oro
                         d’ ’o Granatiello...
E, int’ ’o silenzio, se sente na voce:
     «Ccà sta Teresenella ’a purticese!
     Ddoje pe nu rano ’e purtualle doce!
     E so’ meglio d’ ’e fravule ’e cerase!..»