Canzone e Ariette nove/Ariette nove/Arillo...

Arillo...

../Quanno stammo vicine... ../Aspetta 'a primmavera... IncludiIntestazione 8 novembre 2013 100% Letteratura

Ariette nove - Quanno stammo vicine... Ariette nove - Aspetta 'a primmavera...
[p. 96 modifica]

Arillo, animaluccio cantatore...


Arillo, animaluccio cantatore,
     zerri-zerre d’ ’a sera
     ca nun te stracque maie,
     addo’ te si’ annascosto?
     ’A do’ cante? Addo’ staie?...
          Passo — e te sento.
          E me fermo a sentì...
                    Zicrì! Zicrì!
                    Zicrì! Zicrì!
                         Zicrì!...
     E me pare ca staie
          (mmiez’a ll’èvera nfosa)
          sott’a sta funtanella,
          e int’a stu ciardeniello
               ummedo e scuro
          d’ ’o llario d’ ’o Castiello...

[p. 97 modifica]

          E cammino... E mme pare
               ca no: ca staie ntanato
               dint’a nu pertusillo
               ’e nu spicolo ’e muro...
                    O, chi sa, si’ sagliuto
     ncopp’a na petturata ’e na fenesta,
          e te si’ annascunnuto
          mmiez’ a na testa ’aruta
               e n’ata testa...
  . . . . . . . . . . . . . . . . . .
Sera ’e settembre — luna settembrina,
     ca int’ ’e nnuvole nere
     t’arravuoglie e te sbruoglie,
          e ’a parte d’ ’a marina
          mo faie luce e mo no —
               silenzio, nfuso
          quase ’a ll’ummedità —
               strata addurmuta,
          (ca cchiù scura e sulagna
               quase s’è fatta mo,
               e ca sento addurà
          comm’addorano ’e sera
          cierti strate ’e campagna) —

[p. 98 modifica]

                         arillo,
                    ca stu strillo
          mme faie dint’ ’o silenzio
               n’ata vota sentì...
                    Zicrì! Zicrì!
                         Zicrì!
          accumpagnate ’a casa
               stu pover’ommo,
               stu core cunfuso,
               sti penziere scuntente,
               e st’anema ca sente
               cadé ncopp’a stu munno
               n’ata malincunia —
                    chesta ’e ll’autunno...